Алматы қаласы Медеу ауданы прокуратурасы «Абай атындағы Қазақ ұлттық педагогикалық университеті» КеАҚ ректорының өтініші негізінде оқу орнының мемлекеттік мүлкін иеліктен шығару заңдылығына талдау жүргізді.
Талдау барысында Алматы қаласы, Қонаев көшесі, 80-үй мекенжайында орналасқан (208,8 ш.м. павильон және оған тиесілі жер телімі) университеттің қажеттіліктеріне арналған жылжымайтын мүлік нысанының аффилирленген тұлғалардың пайдасына заңсыз берілгені анықталды. Қазіргі уақытта аталған нысанда алкоголь өнімдерін сататын тәулік бойы жұмыс істейтін мекеме орналасқан. Сонымен қатар, бұл ғимарат университеттің №2 студенттер жатақханасына тікелей жақын жерде орналасқан.
Анықталғандай, 1995 жылы университеттің бұрынғы басшылығы мемлекеттік мүлікті уәкілетті мемлекеттік органдардың қатысуынсыз, мүлікті бағалау, конкурс немесе аукцион өткізбестен, төмендетілген құнмен жекеменшік компанияға берген. Кейіннен жер телімі де жер заңнамасының талаптарын бұза отырып мемлекеттік меншіктен шығарылған.
Одан кейінгі сатып алу-сату мәмілелері өзара байланысты және формалды сипатта болған. Нысан бірнеше рет бұрынғы ректордың отбасы мүшелерімен байланысты тұлғалар арасында қайта сатылып, кейін сыйға тарту шарттары арқылы оның жақын туыстарының иелігіне өткен. Осылайша, университет мүлкі іс жүзінде аффилирленген тұлғалардың пайдасына шығарылған.
Прокуратура сот тәртібімен бастапқы заңсыз мәмілелерді және олардан туындаған кейінгі шарттарды жарамсыз деп тану туралы талап-арыз енгізді.
Соттар аталған мүлікті өткізу кезінде сол кезеңде қолданыста болған мемлекеттік мүлікті жекешелендіру туралы заңнама, жер заңнамасы және жылжымайтын мүлікке құқықтарды мемлекеттік тіркеу жөніндегі азаматтық заңнама талаптарының бұзылғанын анықтады.
Медеу аудандық сотының 2025 жылғы 16 сәуірдегі шешімімен прокуратураның талап-арызы ішінара қанағаттандырылды. Алматы қалалық сотының азаматтық істер жөніндегі сот алқасының 2025 жылғы 3 қыркүйектегі қаулысымен талап-арыз толық көлемде қанағаттандырылды. Кассациялық саты сот актілерін өзгеріссіз қалдырды.
Осылайша, прокурорлық қадағалау актісі бойынша мемлекеттің мүліктік мүдделері қорғалып, университеттің жылжымайтын мүлікке құқықтары қалпына келтірілді.
Заңсыз иеліктен шығарылған мемлекеттік мүлікті анықтау және қайтару жұмыстары жалғасып жатыр.