Үкіметтік емес ұйымдар туберкулезге қарсы көмек жүйесінің негізгі буынның бірі болып қала береді. Олар әлеуметтік осал топтағы науқастарға қолдау көрсетіп, емге бейілділікті арттыруға ықпал етеді, – деп хабарлайды aqshamnews.kz тілшісі.
Өңірлік коммуникациялар қызметінде өткен брифингте «Санат Әлемі» қоғамдық қорының директоры Мұрат Медетов осылай деп мәлімдеді.
Оның айтуынша, ҮЕҰ денсаулық сақтау жүйесі мен халық арасын жақындастырып, әсіресе кемсітуге тап болып, емделуге құлқы болмай жүргендердің арасын байланыстырушы дәнекер болып отыр.
«Біз әлеуметтік осал топтармен, емге бейілділігі төмен науқастармен, кемсітушілікке тап болған адамдармен, яғни сенім мен қолдауды қажет ететін ортада жұмыс істейміз», – дейді.
Ол үкіметтік емес ұйымдардың қызметі кешенді сипатқа ие екенін атап өтті. Оған аутрич-қызметтер, пациенттерді әлеуметтік сүйемелдеу, ақпараттық-түсіндіру жұмыстары, құқықтарды қорғау мен емдеуді үздіксіз қамтамасыз ету де жатады.
«Мұндай тәсіл туберкулезді ертерек анықтап, емдеуді үзіп жіберуді азайтуға, дәріге төзімді түрдің дамуын болдырмауға мүмкіндік береді», – дейді спикер.
Мекемеаралық байланысқа да ерекше назар аударылды. Қор директорының айтуынша, мемлекет, медициналық ұйымдар мен азаматтық қоғам тығыз серіктестік орнатса ғана жақсы нәтижеге қол жеткізуге болады екен.
«Мемлекеттік әлеуметтік тапсырыс тетіктері үкіметтік емес ұйымдарға ұлттық бағдарламаларды іске асыруға нақты үлес қосып, көмекке мұқтаж жандарға атаулы қолдау көрсетуге мүмкіндік береді», – деді Мұрат Медетов.
Оның айтуынша, бірлескен жұмыстың түпкі мақсаты эпидемиологиялық көрсеткіштерді ғана төмендету емес, сонымен қатар әр адам медициналық, әлеуметтік және құқықтық қолдауды дер кезінде ала алатын жүйе құру.
«Күш-жігерімізді біріктіру арқылы ғана біз ортақ мақсат – туберкулезден ада Қазақстан құруға қол жеткізе аламыз», – деп түйіндеді ол өз сөзін.