Жамбыл филармониясында өткен ән-әуен кешіне ҚР Халық әртісі Жәния Әубәкірова, Түркия әртісі Леля Байрамоғұллары және өзге де өнер майталмандары қатысты.
Концерт басталмай тұрып Түркияның Алматыдағы Бас консулы Эврен Мюдеррисоглу құттықтау сөз сөйледі.
"Мен осындай тамаша музыка мектебіне келгеніме өте қуаныштымын. Қазақстан мен Түркия арасындағы тарихи бауырластық көптеген салаларда дамып жатыр. Бүгінгі концерт екі ел арасындағы қарым-қатынасқа оң әсер етеді деп сенемін. Түркітілдес елдердің ынтымақтастығы көптеген салаларда, соның ішінде мәдениет пен өнерде де қарқынды дамып келеді. Анталия қаласының мемлекеттік филармониясының солисті, белгілі флейташы Леля Байрамоғұлларын тыңдауға келгендердің барлығына алғыс айтамыз. Жәния Әубәкіроваға қонақжайлылығы үшін алғыс айтқым келеді", – деді Түркияның Алматыдағы Бас консулы.
Ал Жәния Әубәкірова флейта мен пианино сынды музыкалық аспаптардан шашу шашылған ән-саз кеші күзде тағы да өтетінін айтты.
"Елшілік өкілдеріне шығармашылық жобамызды қолдағаны үшін алғыс айтамын. Шығармашылықта бәрі өте қарапайым – музыканттар кездесіп, композицияларды бірге орындауға келіседі. Алайда, халықаралық шекараны еңсеру үшін бізге мемлекет пен елшілік өкілдері, демеушілер көмектеседі. Леля Байрамоғұллары өте үлкен әлеуметтік жұмыс жүргізіп келеді. Ол әлемнің түкпір-түкпіріндегі тыңдармандарды музыкамен таныстыру үшін әлемдегі әртүрлі халықтармен кездесіп, өз өнерін паш етіп жүр. Бұл музыканы шын сүйетін жүрегі үлкен музыканттарға тән қасиет. Бүгінгі концерт күзде Шуберт пен басқа композиторлардың бағдарламасымен қайта өткізілетінін атап өткім келеді", – деді Жәния Әубәкірова.
