Алматы қаласының Бостандық ауданында «Таза Қазақстан» республикалық акциясы аясында сенбілік өтті. Іс-шара өткен негізгі алаңдардың бірі — халықаралық шаңғы трамплиндерінің аумағы болды, – деп хабарлайды aqshamnews.kz тілшісі.
Акцияға аудан тұрғындары, аға буын өкілдері мен жастар белсенді қатысты. Қатысушылар аумақты тазалап, қоқыс жинады, құрғақ шөптерден арылтып, іргелес аумақты ретке келтірді.
Сенбілікке қатысушыларға қолайлы жағдай жасалды: музыка қойылып, аниматорлар жұмыс істеді. Бұл іс-шараның көңілді әрі тартымды атмосферада өтуіне ықпал етті.
Сенбілікке ауданның белсенді ұзақ өмір сүру орталығының өкілдері — Галина Левченко, Айшам Войнце және Райхан Төлебаева да белсене қатысты.
«Біз мұндай акцияларға жібермей қатысамыз. Бала кезден тазалық пен әсемдікке жауапкершілікпен қарауды үйрендік. Әр адам өзі тұратын жерді күтіп, оны көркейтуге ұмтылуға тиіс», — деді зейнеткер.
Айшам Войнце мұндай іс-шараларға қатысу арқылы өз немерелеріне және өскелең ұрпаққа үлгі көрсетіп жүргенін атап өтті.
«Жастар бізге қарап бой түзейді. Біз күрек алып, сенбілікке шықсақ, олардың да қатысуға тиіс екенін түсінеді. Мұны өз немерелерімізден де көріп жүрміз — олар мектептегі сенбіліктерге қатысып, туған қаласын таза ұстауға тырысады. Демек, біз дұрыс бағытта келеміз», — деді ол.
Акцияға жастар да белсенді түрде қосылды.
«Біз мұндай экологиялық бастамаларға үнемі қатысамыз. Саналы мәдениетті қалыптастыру маңызды. Бұл жастарды біріктіреді әрі қаланың тазалығы әрқайсымызға байланысты екенін көрсетеді», — деді Newman еріктілер ұйымының өкілі Айзере Маратқызы.
Жалпы, аудан бойынша сенбілік үш алаңда өтіп, 14 бірлік арнайы техника тартылды. Іс-шараға жүздеген тұрғын қатысты.