Алматы қаласы бойынша ҚАЖ департаментінің №13 мекемесіндегі сотталғандар танымал қазақстандық дзюдошы, 2008 жылғы Олимпиада ойындарының күміс жүлдегері Асхат Жіткеевпен кездесті, деп хабарлайды aqshamnewa.kz Polisia.kz-ке сілтеме жасап.
Сотталғандар арасында салауатты өмір салтын насихаттау мақсатында ұйымдастырылған кездесуде Қазақстан Республикасының еңбек сіңірген спорт жаттықтырушысы А.Жіткеев сотталғандарға спорттың адам өмірінде алатын маңызына, оның денсаулыққа тигізетін пайдасы жайлы әңгімеледі.
Сонымен қатар А.Жіткеев дені сау адамның еңбекке деген құлшынысы да зор болатынын баса айтып, өзінің спорттық өмірінен мазмұнды мысалдар келтірді. Сотталғандар да спортшыға түрлі сауалдар қойып, өздерінің спортқа деген қызығушылықтарын танытты. Кездесу барысында А.Жіткеев жазалылардың балаларға қатысты спорттық бағдарламалар туралы сұрақтарына жауап берді және сотталғандар болашақта спортпен айналысуға деген ниеттерін жеткізді.