Алматы қаласында жауын-шашын салдарынан су басудың алдын алу мақсатында әл-Фараби даңғылындағы жерасты жаяу жүргіншілер өткелінде су бұру желілерін салу жоспарланып отыр. Бұл туралы Алматы мәслихатының XXII сессиясы барысында қалалық экология және қоршаған орта басқармасы басшысының міндетін атқарушы Мирас Гайсин мәлімдеді, деп хабарлайды aqshamnews.kz
Спикердің айтуынша, жоба аясында әл-Фараби даңғылының оңтүстігінде, Кереңқұлақ пен Есентай өзендерінің арасындағы аумақ қамтылады. Жобада судың үлкен көлемін ескере отырып, арық желілерін реконструкциялау, су ағызғыш орнату, ойықтарды қайта құру және қолданыстағы су бұру желілерін кеңейту жоспарланған.
Қазіргі уақытта басқарма техникалық тапсырма дайындады, ал жобалау-сметалық құжаттаманы әзірлеу осы жылы басталады деп жоспарланып отыр.
Сонымен қатар, Алатау ауданының «Томирис» шағын ауданындағы Джигитовка өзені тоғанының гидротехникалық құрылыстарын қайта жаңарту мәселесі де қозғалды.
«Жалпы, қала аумағында 40 гидротехникалық құрылыс бар, оның 6-ы Алатау ауданында орналасқан және олардың жағдайы мәз емес. Тоғандар каскады 1960 жылдары салынған, содан бері жөндеу жұмыстары жүргізілмеген. Жауын-шашынның көп болуы жағдайында гидротехникалық құрылыстарды шайып кету қаупі бар», - деді Мирас Гайсин.
Бұл мәселелерді шешу үшін басқарма 2024 жылдың 4-тоқсанында гидротехникалық құрылыстарды жаңартуға жобалау-сметалық құжаттаманы әзірлеуді жоспарлап отыр. Жобада тозған гидротехникалық құрылыстар мен көтергіш гидромеханикалық жабдықтарды реконструкциялау, тірек құрылыстарын салу, заңсыз құрылыстарды бұзу, тоғандарды тазалау және жағалауды нығайту, тазарту құрылыстарын орнату және жасыл қорды жаңарту жоспарланған.