2025 жылғы 28 наурызда Алматы қаласындағы №2 Алматы мемлекеттік гуманитарлық-педагогикалық колледжінде «Студенттік театр – құқықбұзушылықтың алдын алу факторы» тақырыбында қалалық әдістемелік семинар өтті. Бұл туралы aqshamnews.kz хабарлайды.
Семинардың мақсаты – колледждің студенттік театрды дамытудағы тәжірибесін тарату және студенттерді театр қызметіне тартудың тиімді әдістерін талқылау.
Семинарға Алматы қаласының білім беру басқармасының жаңа технологиялар бойынша қалалық ғылыми-әдістемелік орталығының, техникалық және кәсіптік білім беру бөлімінің өкілдері, сондай-ақ қаладағы мемлекеттік және жекеменшік колледждердің тәрбие жұмысы жөніндегі директордың орынбасарлары қатысты. Барлығы 80 адам.
Колледж директоры Б. Дуанабаева өз сөзінде студенттік театрдың жастардың адамгершілік құндылықтары мен әлеуметтік жауапкершілігін қалыптастырудағы маңызды рөлін атап өтті.
Тәрбие жұмысы жөніндегі директордың орынбасары И.С. Шелаева «Студенттік театр – құқықбұзушылықтың алдын алудағы тиімді құрал» атты баяндамасында студенттерді құқықтық сана мен девиантты мінез-құлықтың алдын алуға бағытталған театр қызметіне тартудың табысты тәжірибелерін таныстырды.
Семинар бағдарламасының негізгі бөлігінде студенттік театрлар өз қойылымдарын ұсынды:
-
«Дем» театры – «Гауhартас» қойылымынан үзінді. Театр жетекшісі: Ахметова А.М.
-
Форум-театр – «Жалғыздың үні шықпайды» қойылымынан үзінді. Театр жетекшісі: Мусатаева Р.К.
-
Лингвистикалық театр – «Клара Цеткин» қойылымынан үзінді. Театр жетекшісі: Кабланов С.А.
Семинар «Ашық микрофон» форматында аяқталып, қатысушылар өз әсерлерімен бөлісіп, өзекті мәселелерді талқылап, студенттік театрды дамытуға қатысты жаңа идеялар ұсынды.
Қалалық әдістемелік семинар театр өнерінің білім беру процесіндегі маңыздылығын және оның жастардың мінез-құлық мәдениеті мен азаматтық ұстанымын қалыптастыруға әсерін растады.
Семинар туралы толық ақпаратты колледждің ресми сайтынан табуға болады.