Алматы қаласының әкімі Дархан Сатыбалды атмосфералық ауаны қорғау қағидаларын іске асыру аясында стационарлық шығарындылар көздеріне бақылауды күшейтуді тапсырды, – деп хабарлайды aqshamnews.kz тілшісі.
Соңғы мәліметтерге сәйкес, стационарлық көздер — энергетика нысандары, бизнес субъектілері (қоғамдық тамақтану орындары, моншалар) және жеке тұрғын сектор — қаладағы жалпы шығарындылардың шамамен 40 пайызы болады. Бұл бағытта жүйелі әрі қатаң бақылау орнатудың қажеттігін көрсетеді.
Берілген тапсырмаға сәйкес, барлық нысан заманауи газ тазарту құрылғыларымен жабдықталуға тиіс. Ал шаң түзілу қаупі жоғары кәсіпорындарда шаңды басу технологияларын енгізу міндеттеледі.
Сонымен қатар тұрақты негізде зертханалық өлшеулер жүргізіліп, олардың нәтижелері уәкілетті органдарға ұсынылуы, сондай-ақ экологиялық іс-шаралар бойынша жыл сайын есеп берілуі қамтамасыз етілуге тиіс.
Жекелеген бағыт ретінде экологиялық таза отын түрлеріне көшу мәселесі қарастырылуда. Газдандырылған аудандарда тиісті тазарту жүйелерінсіз қатты отынды пайдалануға шектеу енгізіледі. Ал нысандарды кезең-кезеңімен газға немесе электр энергиясына көшіру жоспарланып отыр.
Бақылау уәкілетті мемлекеттік органдар тарапынан автоматтандырылған мониторинг жүйелері арқылы, сондай-ақ жоспарлы және жоспардан тыс тексерулер шеңберінде жүзеге асырылады.
Қала әкімі қайталанатын заңбұзушылықтар жағдайында айыппұл салумен шектелу жеткіліксіз екенін айтты. Мұндай жағдайда нысандардың қызметін уақытша тоқтатуға дейінгі қатаң шаралар қолданылуға тиіс.