ТЖМ құтқарушылары қызыл жалынмен күресуде
2025 жылғы 16 ақпанда сағат 20:11-де Алматы қаласы Төтенше жағдайлар департаментінің (ТЖД) күштері мен құралдары жоғары дәрежедегі шақырту бойынша Алатау ауданы, Рысқұлов даңғылы, 103/2а мекенжайына жедел жетті. Оқиға орнына 20:17-де келгенде, қойманың ашық жалынмен жанып жатқандығы анықталған, деп хабарлайды aqshamnews.kz.
Өрт сөндірушілер дереу өрт оқпандарын енгізіп, автоцистерналарды өрт гидранттарына қосып, судың үздіксіз берілуін қамтамасыз етті. Оқиға орнында жедел штаб құрылып, өртті сөндіру екі учаскеге бөлінді, сондай-ақ өрт сөндіру автосатысы орналастырылды.
Қабылданған жедел шаралардың нәтижесінде өрттің көршілес қоймаларға таралуына жол берілмеді. Зардап шеккендер жоқ. Өрттің шығу себептері анықталуда.
Алматы қ. өрт сөндірушілері Рысқұлов даңғылындағы базар аумағында қойманың өртін сөндіруде. Оқиға орнына Алматы қ. ТЖД бастығы Нұрлан Атығаевтың қатысуымен өртті сөндіруге арналған штаб жұмылдырылды. Құтқарушылар жоғары дәрежемен жұмыс істеуде.