Алматы қаласындағы М. Базарбаев атындағы №138 гимназияда педагогикалық еңбек ардагерлерін ұлықтауға арналған республикалық «EDUTALK» кеші өтті.
Іс-шарада ұстаз мамандығының маңыздылығы, оның қиын да қадірлі жолы мен қоғамға қосқан елеулі үлесі сөз болды, деп хабарлайды aqshamnews.kz.
Бұл күні гимназияда «Қазақстанның Еңбек Ері», «Қазақстан Республикасының еңбек сіңірген ұстазы» атағына ие болған танымал педагогтер: Гүлжанар Нұрпейісова, Орынша Қарабалинa, Майра Мәмбетова, Ләззат Есмағанбетова, Гүлбану Махамбетова, филология ғылымдарының докторы Асылы Осман, қоғам қайраткері, тарих ғылымдарының профессоры Қайыркен Күнафина, ҚР мәдениет қайраткері Гүлшара Есетова және еліміздің әр өңірінен келген мектеп басшылары мен мұғалімдері бас қосты.
Кештің шымылдығы «Көктегі алау» атты театрландырылған қойылыммен ашылды. Онда гимназияның жоғары сынып оқушылары Ұлы Отан соғысы жылдарындағы жалғыз қазақ ұшқыш қызы – Хиуаз Доспанова мен сол кезеңдегі ерлікпен қаза тапқан барлық батырлардың рухына арнау ретінде өнер көрсетті.
Кеш барысында ұстаздар жүрек тебірентерлік естеліктерімен бөлісіп, ұстаздықтың – тек білім беру емес, адам тағдырын өзгерте алатын миссия екенін дәлелдеді.
№138 гимназия директоры Медет Қасымбаев өзінің білім ордасын басқару жолындағы өмірлік тәжірибесімен бөлісіп, көрермендердің ыстық ықыласына бөленді.
Сахнаға шыққан ардагер ұстаздардың әрбір сөзін көрермендер зор қошеметпен қарсы алды. Кештің пікірталас бөлігі де көрермендер қызығушылығын тудырды. «Ұстаз — миссия ма, мамандық па?» деген тақырып қызу талқыланып, қатысушылар мазмұнды сұрақтар қойып, тұшымды жауаптар алды. Сондай-ақ «Бір қателік – үлкен өкініш», «Бір күлкі – мыңдаған мотивация» секілді өмірлік ой тудырар тақырыптар кеңінен талқыланды.
— Бүгінгі «EDUTALK» кеші — ашық әрі шынайы диалог алаңына айналды. Өмір жолдары мен кәсіби тәжірибелері жас ұрпаққа үлгі боларлық ұстаздар жайлы айтылған әрбір әңгіме жас буынның ұстаз мамандығына деген құрметін арттыра түсті, — деді Бостандық ауданы білім бөлімінің басшысы Айгүл Қасымбек.
Іс-шара Қазақстан Республикасы Оқу-ағарту министрлігі жанындағы Ардагерлер республикалық кеңесінің 2025 жылғы 26 наурыздағы №11 хаттамалық тапсырмасын орындау аясында және жалпыадамзаттық пен ұлттық құндылықтарға негізделген Бірыңғай тәрбие бағдарламасын жүзеге асыру мақсатында ұйымдастырылды.