Алматыда қысқа дайындық: автопаркті жаңарту, арнайы техника сатып алу жүріп жатыр
Алматыда қысқы кезеңде қалаға қызмет көрсету үшін 918 бірлік техника дайындалған, ал жолдар мен тротуарларды тазалауға 1 400 жол жұмысшысы тартылуы мүмкін. Бұл туралы мегаполистің коммуналдық инфрақұрылымды дамыту басқармасы мәлімдеді, деп хабарлайды aqshamnews.kz
Қазіргі уақытта жалпы ұзындығы 2,7 мың км асатын 2 318 көшеде санитарлық тазалау жұмыстары жүргізілуде.
Күндізгі кезеңде көшелерді тазалауға күн сайын шамамен 600 техника бірлігі және 800 жол жұмысшысы жұмылдырылса, түнгі ауысымда 220 техника бірлігі және 250 жол жұмысшысы тартылады.
Он мердігер ұйым қысқы кезеңге дайындық жұмыстарын аяқтады: өндірістік базалар, арнайы техника, жүргізушілер мен жол жұмысшыларына арналған демалыс бөлмелері дайындалған, көктайғаққа қарсы және жанар-жағармай материалдары, қосалқы бөлшектер, қажетті құралдар, қысқы арнайы киімдер сатып алынған. Сонымен қатар, қысқы жабдықтар жиынтығы орнатылып, маусымдық техникалар қайта жарақтандырылған, қар үйінділерінің орналасу орындары келісілген.
Көктайғаққа қарсы материалдар да дайындалды.
Жұмыстардың сапасы мен жеделдігін арттыру үшін және «Алматы Тазалық» МКК автопаркін жаңарту мақсатында 22 мамандандырылған техника сатып алынды. Жыл соңына дейін тағы 10 бірлік техника сатып алу жоспарланған.
Қалың қар жауған жағдайда қаланың құрылыс ұйымдары қосымша 150-ге дейін самосвалдар мен тиегіштерді, сондай-ақ 1 000-ға дейін жұмысшыны қамтамасыз етеді.
