Алматыда «Қазақстанның үздік тауары» байқау-көрмесінің өңірлік кезеңі өтті.
Абай алаңында, Республика сарайының алдында «Қазақстанның үздік тауары» республикалық байқауының өңірлік кезеңі өтті. Іс-шараға Алматы әкімі Дархан Сатыбалды, «Атамекен» ұлттық кәсіпкерлер палатасы президиумының төрағасы Райымбек Баталов, сондай-ақ қала кәсіпкерлері қатысты.
Бұл байқау 2006 жылдан бері Мемлекет басшысының тапсырмасымен өткізіліп келеді. Мақсаты – отандық өндірушілерді қолдау, шағын және орта бизнесті дамыту, қазақстандық өнімді тұтыну мәдениетін қалыптастыру және ішкі нарықты сапалы, бәсекеге қабілетті тауармен қамтамасыз ету.
Алматы әкімі Дархан Сатыбалды қатысушыларды құттықтап, байқаудың кәсіпкерлікті қолдаудағы маңызына тоқталды. Әкімнің айтуынша, өңірлік кезеңнің жеңімпаздары уақыт сынынан өткен өнім сапасының мойындалуына қол жеткізіп қана қоймай, Алматыны ұлттық деңгейде таныстыру жауапкершілігін де арқалайды.
«Құрметті қатысушылар мен жеңімпаздар! Сіздермен бүгін осында жүздескеніме қуаныштымын. «Қазақстанның үздік тауары» байқауы Алматыда игі дәстүрге айналды. Жеңіс жай ғана марапат емес, бұл ең әуелі сіздердің өнімдеріңіздің жоғары сапасына берілген баға. Сіздердің тауарларыңызды алматылықтар ғана емес, еліміздің серіктестері де таңдайды. Сіздер ұлттық кезеңде қаламызды намысын лайықты қорғайсыздар деп сенемін. Алматы елдегі кәсіпкерлік дамуының нағыз орталығы, әрқайсыңыз "Қазақстанда жасалған" брендіне үлес қосып отырсыздар», – деді Дархан Сатыбалды.
Байқаудың жеңімпаздары:
- Өндірістік мақсаттағы үздік тауарлар: «KazMedAspap» ЖШС, «QAZAQ TIGIN FABRIKASY» ЖШС, «IT&M» ЖШС
- Халық тұтынатын үздік тауарлар: «KSC-PLAST» ЖШС, «PAPIRONE» ЖШС, «Aigul Line» ЖШС
- Үздік азық-түлік тауарлары: «БИЖАН ет өңдеу зауыты» ЖШС, «Жигалма» ЖШС, «GOJI» ЖШС
- Арнайы номинация «Сала көшбасшысы – қаланың серіктесі»: «Mega бетон плюс» ЖШС, «Қазлегпром-Алматы» ЖШС, «Астана Моторс» компаниялар тобы, «MARCHALL» ЖШС, «Ай-Ханым» ЖК (Qulpynai), «Le Porte M» ЖШС, «Xfinity Solutions» ЖШС, «Қазақстандық құбыр жүйелері» ЖШС, «TELLI ONDIRIS» ЖШС, «TEPLOSTIL» ЖШС, «BLS GROUP» ЖШС, «City Stone» ЖШС, «Lemonadoff Food» ЖШС, «KNG.PRO» ЖШС.
Өңірлік кезеңнің жеңімпаздары республикалық финалда бақ сынап, «Қазақстанның үздік тауары» атағына үміткер атанады. Іс-шара барысында өнімдер көрмесі, концерттік бағдарлама мен марапаттау рәсімі өтті.
Сонымен бірге «Бір ауыл – бір өнім» жобасы аясында алматылық өндірушілердің жәрмеңкесі ұйымдастырылды. Онда 40-қа жуық шағын және орта бизнес өкілі мен жеке кәсіпкер өнімдерін ұсынды. Жәрмеңке қорытынды бойынша 10 үздік өндіруші анықталып, олар өңірлік Бренд комитетінің іріктеу кезеңіне жолдама алды.