1995 жылғы 7 сәуір – тәжік-ауған шекарасында Қазақстан Республикасы Ішкі істер министрлігі Ішкі әскерінің 17 жауынгері ерлікпен қаза тапқан тарихи күн. Биыл осы қайғылы әрі қаһармандық оқиғаға 30 жыл толып отыр, деп хабарлайды aqshamnews.kz.
Алматы қаласындағы 3650 әскери бөлімінің аумағында тәжік-ауған шекарасында қызмет бабында қаза тапқан сарбаздарға арналған ескерткіш тақта ашылды. Іс-шараға Ұлттық ұланның «Оңтүстік» өңірлік қолбасшылығының және 3650 әскери бөлімінің басшылығы, сол бір тарихи миссияға қатысқан ардагерлер, жергілікті атқарушы билік өкілдері, оқушылар мен әскеир бөлімнің жеке құрамы қатысты.
Шара барысында қатысушылар ескерткіш алдына гүл шоқтарын қойып, бір минут үнсіздікпен боздақтардың рухына тағзым етті. Әскери оркестрдің орындауында Мемлекеттік Гимн шырқалды. Жиналған қауым алдында Қазақстан Республикасы Ұлттық ұланы «Оңтүстік» өңірлік қолбасшылығының қолбасшысы генерал-майор Талапкер Әміреевтің атынан ардагерлерге алғыс сөз оқылып, ерлік пен елдік туралы естеліктер айтылды.
– Біздің буынның өз миссиясы болды. Біз антымызға адал болдық. Жауынгерлік тапсырмаларды орындау кезінде қарулас жолдастарымыз көз жұмды. Олардың ерлігі ешқашан ұмытылмауы тиіс, – деді қанды шайқастың куәгері Жанат Несіпов сол күндерді еске алып.