Полицияның 3 қызметкеріне үкім шықты, олар қару мен оқ-дәрілерді ұрлады деп айыпталды, деп хабарлайды aqshamnews.kz Бостандық аудандық сотына сілтеме жасап.
Алматы қалалық полиция департаментінің қызметкерлері есептен шығарылған 50-ге жуық қаруды ұрлап, оларды заңсыз сатқан.
Оның ішінде Калашников автоматы, мылтық, Макаров тапаншалары, гранаталар мен әртүрлі калибрдегі оқ-дәрілер болған.
Сот үкіміне сәйкес, бұл қылмыстық схемаға Тыл басқармасына қарасты әскери және арнайы қамтамасыз ету бөлімінің аға инспекторы М.Ж., Полиция департаментінің криминалисті М.Ш. және жүргізуші Н.А. қатысқан. Олар жоюға арналған қаруды жүйелі түрде ұрлап, сатқан деп танылды.
"Тергеу барысында анықталғандай, Тыл басқармасына қарасты бөлімнің аға инспекторы сот істері бойынша айғақ зат ретінде сақталған немесе тәркіленген атыс қаруларын алдымен заңды түрде есептен шығарған. Жойылуы тиіс қарулар шын мәнінде ұрланған. Қалған екі әріптесі (екеуі де ПД қызметкерлері) бұл қарулардың зауыттық нөмірлерін жойып, бояп немесе өзгертіп, сатқан. Кейін полиция қызметкері олар жойылды деген жалған ақпаратты ресми тіркеулерге енгізіп отырған", - делінген сот хабарламасында.
Бостандық аудандық сотының үкімімен 3 айыпталушы да жүйелі түрде қару ұрлап, сату ісі бойынша кінәлі деп танылды. Схеманың ұйымдастырушысы - Полиция департаментінің аға инспекторы М.Ж. 8 жылға, криминалист - 5,5 жылға, жүргізуші - 7 жылға бас бостандығынан айырылды.
"Қызметтік өкілеттіктерін пайдаланып, олар бірнеше мәрте алдын ала сөз байласу арқылы атыс қаруы мен оқ-дәрілерді ұрлаған. Бұл қарулар айғақ зат ретінде арнайы қоймаға тапсырылған. Олар бұл қаруларды заңсыз айналымға шығарған, қоғамдық қауіпсіздік пен тәртіпке қарсы әрекеттер жасаған, сондай-ақ мемлекеттік қызмет пен басқару мүддесіне қарсы ауыр қылмыстар жасаған", – делінген сот үкімінде.
Полицейлер арнайы шендерінен айырылып, екеуіне мемлекеттік қызметте өмір бойы жұмыс істеуге тыйым салынды.