25 қатысушының 1-еуі қайтыс болғандықтан, қылмыстық жауапкершіліктен босатылды.
Бостандық ауданының №2 сотында қаңтар оқиғасына қатысқан 25 азаматқа қатысты қылмыстық іс қаралды, деп хабарлайды Almaty-akshamy.kz
“2022 жылғы 4-5 қаңтар аралығында Алматы қаласының түрлі бөліктерінде 25 сотталушы жаппай тәртіпсіздіктерге қатысып, аса ірі мөлшерде ұрлық жасады, тұрғын үй, қызметтік және өндірістік үй-жайларға заңсыз кіріп, ірі залал келтіре отырып, көлік құралдарын айдап әкетті, қауіпті өндірістік нысанның аумағына, сондай-ақ арнайы органдар күзететін басқа да нысандарға заңсыз кірді, бұл елеулі залалын тигізіп, басқа да ауыр зардаптарға әкеп соқты. Сондай-ақ, олар алдын ала сөз байласу арқылы өздерінің оқ-дәрілерін, атыс қаруларын ұрлап әкеткен, төтенше жағдай жарияланған жерде жаппай тәртіпсіздіктер кезінде адамдар тобы алдын ала сөз байласып, билік өкілдерінің денсаулығына залалын тигізіп, олардың мүлкін бүлдіргені және жойғаны анықталды”, – делінген сот хабарламасында.
Сот шешімі бойынша 20 азаматқа "Рақымшылық жасау туралы" заң қолданылып, 9 айдан 1 жыл 9 айға дейінгі мерзімге шартты жаза тағайындалды.
Сондай-ақ "Рақымшылық туралы" заң қолданылған тағы төрт тұлға жазадан босатылды.
Айта кетейік, 2023 жылдың 24 сәуірінде сот ҰҚК экс-басшысы Мәсімовті мемлекетке опасыздық жасағаны, билікті басып алуды насихаттағаны және лауазымдық өкілеттіктерін асыра пайдаланғаны үшін кінәлі деп тапты. Ол 18 жылға бас бостандығынан айырылды, мүлкі тәркіленді және өмір бойы мемлекеттік қызметте қызмет ету құқығынан айырылды.