Алматы қаласы полиция департаментінің қабылдау-тарату мекемесінің қызметкерлері ұзақ уақыт бойы құжатсыз жүрген Өзбекстан Республикасының азаматына көмек көрсетті, , – деп хабарлайды aqshamnews.kz тілшісі.
25 ақпанда профилактикалық рейдтік іс-шаралар барысында 50 жастағы азамат қабылдау-тарату мекемесіне жеткізілді. Оның жеке басын куәландыратын құжаттары болмаған. 2015 жылы Алматы облысының аумағындағы базарлардың бірінде жеке заттары мен құжаттарын жоғалтып, содан бері қиын өмірлік жағдайға тап болған. Көп жыл бойы кездейсоқ табыспен күн көріп, құжаттарын өз бетінше қалпына келтіруге мүмкіндігі болмаған. Полиция қызметкерлері Өзбекстан Республикасының консулдық қызметімен өзара іс-қимылды ұйымдастырды. Жүргізілген жұмыстардың нәтижесінде дипломатиялық өкілдік тарапынан азаматқа отанына қайтуға арналған уақытша құжат – қайту туралы куәлік рәсімделді. Қажетті рәсімдер аяқталғаннан кейін ер адам еліне жіберілді. Енді ол өз елінде жеке құжаттарын қалпына келтіріп, қалыпты өмірге қайта оралу мүмкіндігіне ие болады.
– Біздің міндетіміз – тек құқықтық тәртіпті қамтамасыз ету ғана емес, сондай-ақ қиын өмірлік жағдайға тап болған адамдарға қолдау көрсету. Полиция мен консулдық қызметтің өзара іс-қимылының арқасында бұл азамат отанымен байланысын қайта қалпына келтіріп, өмірін жаңадан бастауға мүмкіндік алды, - деді Алматы қаласы ПД қабылдау-тарату мекемесінің бастығы Геннадий Мен.
Полицияда мұндай жұмыс тұрақты негізде жүргізілетіні, оның мақсаты – көші-қон заңнамасының сақталуын қамтамасыз ету ғана емес, сонымен қатар әлеуметтік тұрғыдан осал жағдайдағы азаматтарға қажетті қолдау көрсету екені атап өтілді.