Алматыда "Жаяу жүргінші" жедел-профилактикалық іс-шарасы жалғасуда.
Осы орайда қалалық полиция департаментінің қызметкерлері №28 жалпы білім беретін мектепке арнайы барып, "Жас Сақшы" полиция сыныбының оқушыларына жол қозғалысы ережелеріне арналған ашық сабақ өткізді.
Сабақ барысында тәртіп сақшылары балаларға жолда жүру мәдениеті мен қозғалыс ережелерінің маңыздылығын қарапайым әрі қызықты түрде түсіндіріп, жаяу жүргіншілердің – соның ішінде балалардың – қауіпсіздігін қамтамасыз ететін негізгі қағидаларға тоқталды.
Шарада оқушылар белсенділік танытып, сұрақ-жауапқа қатысып, алған білімдерін бекітіп, жолдағы түрлі оқыс жағдайларды дұрыс талдауды үйренді.
– Сабақ барысында балаларға күнделікті өмірде кездесетін жол қауіптері туралы кеңінен айтылды. Жаяу жүргіншілер мен жүргізушілердің жиі жіберетін қателіктері де назардан тыс қалмады. Полицейлер жолды қалай дұрыс кесіп өту керек екенін, қоғамдық көлік күтіп тұрғанда қауіпсіз орын таңдаудың маңыздылығын және жаяу жүргіншілер өткелінде де сақтық шараларын қаперде ұстау қажеттігін жан-жақты түсіндірді, – деді Медеу аудандық полиция басқармасы әкімшілік полиция бөлімінің бастығы Арман Усаев.
"Жас Сақшы" сыныбы – балалардың құқықтық сауаттылығын арттырып, қазақстандық полиция қызметінің ерекшеліктерін таныстыратын бірегей жоба. Осындай сабақтар жасөспірімдерге құқықтық білім беріп қана қоймай, оларды жолда қауіпсіз жүріс-тұрыс мәдениетіне баулиды.
Алматы полициясы балалардың қатысуымен болатын жол-көлік оқиғаларының алдын алу мақсатында профилактикалық жұмыстарды жүйелі түрде жүргізуде. Сондай-ақ тәртіп сақшылары ата-аналарды да балаларға жолда өзін қауіпсіз ұстаудың қарапайым әрі маңызды қағидаларын үйретуге шақырады.