Қоғамдық қауіпсіздікті қамтамасыз етуде жаңа технологияларды кеңінен қолдану – заман талабы.
Осыны ескере отырып, Алматы қаласының полициясы құқық бұзушылықтардың және жол-көлік оқиғаларының алдын алу мақсатында әлеуметтік роликтер, сюжеттер мен репортаждар әзірлеуге ерекше назар аударады, деп хабарлайды aqshamnews.kz Polisia.kz-ке сілтеме жасап.
Бұл медиа өнімдер кейіннен теледидар экрандарынан көрсетіліп, интернет-порталдарда, полиция департаментінің ресми аккаунттарында жарияланады, сондай-ақ әлеуметтік желілер арқылы кеңінен таратылады.
- Жол қозғалысы қауіпсіздігі тақырыбында әзірге үш бейнеролик дайындалды. Олар жолдағы қауіпті жағдайларға ықпал ететін және көбінесе ірі жол-көлік оқиғаларының себебіне айналатын ережебұзушылықтардың жиі кездесетін түрлерін қамтиды. Сонымен қатар бұл бейнематериалдар барлық жастағы көрермендерге арналған, – деді Алматы қалалық ПД әкімшілік полиция басқармасының бастығы Асхат Құлбаев.
Спикердің айтуынша, жаяу жүргіншілердің қатысуымен болатын жол-көлік оқиғаларының саны жыл сайын артып келеді. Бұл – қоғам үшін алаңдатарлық жағдай. - Жол қозғалысына қатысушылардың әрқайсысы, ең алдымен, өз қауіпсіздігін ойлап, жол ережелерін қатаң сақтауы тиіс. Балалар үлкендердің іс-әрекетін қайталайтындықтан, ересектер оларға дұрыс үлгі көрсетуі қажет. Сол себепті әрбір ата-ана өзіне де, баласына да қауіпсіз орта қалыптастыруға мән беруі керек. Біз жаяу жүргіншілерді жол қозғалысы мәдениетін сақтауға шақырамыз, – деп атап өтті Асхат Құлбаев.