Алматыда пайдаланылған батареяларды тегін қабылдауға арналған пилоттық жоба іске қосылды, – деп хабарлайды aqshamnews.kz тілшісі.
Бастама Eco Network жобасы аясында жүзеге асырылуда. Оның негізгі мақсаты – қатты тұрмыстық қалдықтар полигондарына түсетін қауіпті қалдықтардың көлемін азайту және қала тұрғындарының экологиялық жауапкершілік мәселесіне назарын аудару.
Батареяларды жинауға арналған арнайы контейнер Гоголь көшесі, 58 мекенжайындағы «Меломан» дүкенінде орнатылды. Кез келген тұрғын пайдаланылған қуаттағыш құрылымдарын тегін тапсыра алады. Жоба халықтан тұрмыста қолданылған батареяларды қабылдауға бағытталған. Пилоттық кезең аясында бір адамнан 10 пайдаланылған батареядан артық қабылданбайды.
Жоба енді ғана іске қосылғанына қарамастан, қала тұрғындары пайдаланылған батареяларды белсенді түрде әкеліп, экологиялық бастамаларға жоғары қызығушылық танытып отыр.
Жобаға ақпараттық қолдауды «Eco Almaty» ЖШС көрсетуде. Ұйымдастырушылар пилоттық жоба тұрғындар тарапынан қолдау тауып, болашақта Алматыда пайдаланылған батареяларды қабылдау пункттерінің желісін кеңейтуге негіз болады деп үміттенеді.
Экологтар батареялардың құрамында сынап, кадмий, қорғасын және никель сияқты ауыр металдар мен улы заттар бар екенін ескертеді. Олар кәдімгі қоқыс полигонына түскен жағдайда, уақыт өте келе сыртқы қабығы бұзылып, қауіпті қосылыстар топырақ пен жерасты суларына таралады. Бұл қоршаған ортаның ластануына әкеліп, адамдардың, жануарлар мен өсімдіктердің денсаулығына кері әсерін тигізуі мүмкін.
Эколог, Eco Network жобасының негізін қалаушы Евгений Мұхамеджановтың айтуынша, қалдықтарды бөлек жинауға арналған қолжетімді инфрақұрылымды дамыту – экологиялық мәдениет пен жауапты тұтыну дағдыларын қалыптастыру жолындағы маңызды қадам. Ал батареяларды қабылдау санына шектеу қою контейнердің негізінен тұрғындардың тұрмыстық қалдықтарын жинауға пайдаланылуын қамтамасыз ету үшін енгізілген. Бұл ұйымдар мен кәсіпорындардан көп көлемде әкелінетін батареяларды қабылдауға жол бермеуге мүмкіндік береді.