Алматыда көпбалалы отбасы тұратын үйден өрт шықты. Дер кезінде іске қосылған өрт дабылы арқасында тұрғындар оянып, үйден шығып үлгерген. Соның нәтижесінде құтқарушылар уақыт оздырмай шақырылып, өрттің ұлғаюына жол берілмеді, – деп хабарлайды aqshamnews.kz тілшісі.
Оқиға бүгін таңертең Новгородская көшесінде болған.
Төтенше жағдайлар қызметінің мәліметінше, өрт шыққан сәтте құтқарушылар бес минут ішінде оқиға орнына жеткен. Сол кезде үйдің шатыр бөлігі жанып жатқан. Мамандардың айтуынша, баспана тез жанатын материалдардан тұрғызылғандықтан, жалынның жылдам таралу қаупі жоғары болған.
Ведомствоның хабарлауынша, 2025 жылдың қазан айында орнатылған өрт датчигі уақытында дабыл берген. Соның арқасында үй тұрғындары оянып, сыртқа шығып үлгерген әрі бірден өрт сөндірушілерді шақырған.
Өрт қысқа уақыт ішінде оқшауланып, толық бақылауға алынған. Абырой болғанда, оқиға салдарынан зардап шеккендер жоқ.