Радиоэлектроника және байланыс әскери-инженерлік институтының ақпараттық-насихаттау тобы Түрксіб ауданындағы № 78 мектеп-гимназиясының жоғары сынып оқушыларымен кездесті.
Әскери білім беретін мекемелердің өкілдері оқушыларға ҚР Қарулы күштерінде қызмет ету перспективалары туралы әңгімелеп берді. Оларды жоғары оқу орнының тарихымен, оқуға түсу ережелерімен және әскери институтта оқу шарттарымен таныстырды, деп хабарлайды Almaty-akshamy.kz ҚР Қорғаныс министрлігіне сілтеме жасап.
«Кездесу қызық өтті. Бізге өмірін күрделі, бірақ аса маңызды миссияға – Отанды қорғауға арнаған әскери адамдардың батылдығы мен ерлігі туралы айтылды. Өз өмірімді осындай асыл мамандықты үйренуге арнаймын деп шешім қабылдадым», – деді «Жас сарбаз» сыныбының тәрбиеленушісі Шыңғысхан Әлімбеков.
Оқушыларға бейнематериалдар көрсетіліп, ақпараттық буклеттер таратылды.
Институт бастығының тәрбие және идеологиялық жұмыс жөніндегі орынбасары полковник Медғат Мадрахимов мұндай іс-шаралар курсанттарды іріктеу сапасын арттыруға ықпал ететінін атап өтті.
Радиоэлектроника және байланыс әскери-инженерлік институты «әскери істегі радиотехника және инжиниринг», «әскери істегі радиоэлектроника және инжиниринг», «әскери істегі автоматтандыру және инфокоммуникациялық технологиялар», «әскери істегі ақпараттық қауіпсіздік жүйелері», «әскери істегі дирижерлеу», «әскери істегі журналистика және қоғаммен байланыс», «әскери құрылыс, ғимараттар мен құрылыстарды пайдалану» мамандықтары бойынша офицерлер дайындайтынын естеріңізге сала кетейік.