Алматыда онлайн танысу арқылы ұйымдастырылған тонау оқиғасына қатысты үш күдікті – екі ер адам мен бір әйел ұсталды, деп хабарлайды Аqshamnews.kz Polisia.kz-ке сілтеме беріп.
Алмалы аудандық полиция басқармасының мәліметінше, қала тұрғыны танысу қосымшасы арқылы бір қызбен танысып, оның үйіне барған. Алайда әңгіме барысында қыздың екі ер танысы келіп, жәбірленушіні қорқытып, оның құнды заттарын тартып алған. Кейін күдіктілер оқиға орнынан бой тасалаған.
Полиция жедел әрекет етіп, күдіктілерді ізін суытпай ұстаған. Қазір олар уақытша ұстау изоляторына қамалды. Қылмыстық кодекстің "тонау" бабымен іс қозғалды.
Алмалы аудандық полиция басқармасының бастығы Мақсат Пшан мұндай схема бұған дейін де қаланың өзге аудандарында тіркелгенін атап өтті. Ол азаматтарды интернет арқылы танысу кезінде барынша сақ болуға шақырды:
"Азаматтарды интернет арқылы танысу кезінде, әсіресе алғашқы кездесулерде, аса мұқият болуға шақырамыз", – деді Алмалы аудандық полиция басқармасының бастығы Мақсат Пшан.
Алматы қалалық полиция департаменті азаматтарды қырағы болуға шақырады: бейтаныс адамдарға сенбеу, күмәнді мекенжайларға бармау және жаңа таныстармен кездесуге шыққанда жақындарына міндетті түрде хабарлау қажет.