Ұялы операторлардың SIM-карталарын пайдалана отырып, несиелер алуға өтінімдер рәсімдеген
Алматыда азаматтардың жеке деректерін пайдалана отырып, алаяқтық жолмен банкттен 35 млн теңгеден астам қаржы ұрламақ болғандар бас бостандығынан айырылды, деп хабарлайды Almaty-akshamy.kz.
Алматы қалалық прокуратурасының мәліметінше, «D....» сайтында алаяқтар ҚР азаматтарының электрондық сауалнамалық деректерін сатып алып, содан кейін олардың келісімінсіз және ескертусіз банк сайтында ұялы операторлардың SIM-карталарын пайдалана отырып, несиелер алуға өтінімдер рәсімдеген және интернет-банкинг арқылы ұрланған ақша қаражатын жалған тұлғалардың шоттарына аударып отырған.
«Қылмыс жасау үшін алаяқтар қажетті техника сатып алып, абоненттік нөмірлердің бір реттік сим-карталарын пайдалану арқылы банктің жеке кабинетіне тіркелген. Әрі қарай, банктік картаның деректері мен шоттарына ие бола отырып, олар әртүрлі сомаларға кедергісіз несие рәсімдеген»,- деп хабарлады ведомстводан.
Медеу аудандық соты кінәлілерді аса ірі мөлшерде алаяқтық жасағаны үшін 6 жылға бас бостандығынан айырды.
Қала прокуратурасы мегаполис тұрғындарын сақ болуға және алаяқтардың айла-амалдарына түспеуді тағы да ескертеді.