Алматыда «Өмір ерте басталады: шала туған балаларға көмектесудегі ұлттық басымдықтар» тақырыбында халықаралық ғылыми-білім беру конференциясы басталды.
Алқалы жиын – тәжірибе алмасу, жетістіктерді талқылау, жаңа мақсаттарды белгілеу және ең бастысы жарық дүниеге қазір ғана келген, бірақ салмағы аз, жетіле қоймаған бөбектердің амандығы үшін күш біріктіру мүмкіндігі.
Конференция спикерлері неонатологияның өткір мәселелерін, мәселен, «Шала туған нәрестелердегі сурфактантті терапия», «Перзентханадағы алғашқы реанимация және тұрақтандыру», «Неонатальды сепсис» тақырыптарын, Қазақстан бойынша ең алғаш болып біздің Алматыда ашылған, шала туған сәбилердің өсіп-жетілуіне көп көмегі тиіп жатқан «Сүт банкінің» артықшылығын талқылауда. Әрине, жарық дүние есігін ашатын барлық нәрестенің тек анасының омырау сүтімен қоректенуі маңызды екені де айтылуда.
«Біз бұл конференциямызды 17 қарашада аталып өткен Халықаралық шала туған нәрестелер күніне арнаймыз. Біздің мамандар мықты әрі жүректі, мейірімді! 500 грамм болып туған бөбектерді де адам қатарына қосып жатыр. Бүгінгі күні білікті дәрігерлердің күш-жігерінің, күтім жасаудағы заманауи технологиялардың және мемлекет қолдауының арқасында елімізде мыңдаған бала салауатты және толыққанды өмір сүруге мүмкіндік алуда. Біз Қазақстанның ДДСҰ мен ЮНИСЕФ-тің халықаралық стандарттарын белсенді түрде енгізіп, перинаталдық желіні нығайтып, шала туған нәрестелерге күтім жасауда пәнаралық тәсілді дамытып отырғанын мақтан тұтамыз», – деді конференция ұйымдастырушысы профессор Қарлығаш Жұбанышева.
Конференцияның екінші күні ертең Алматыдағы Перинатология және балалар кардиохирургиясы орталығында «шеберлік сабақтарымен» жалғасады.
