Радиоэлектроника және байланыс әскери-инженерлік институтының оқу-жаттығу орталығында әскерге шақырылушылардың ант қабылдау рәсімі салтанатты түрде өтті.
Сарбаздар әскери институттың күзеті мен қорғанысына жауап беретін ротада қызмет етеді. Бір айлық жас жауынгер курсынан үйренген олар Отанға адал қызмет етуге және әскери борышын лайықты орындауға ант берді, деп хабарлайды Almaty-akshamy.kz Қорғаныс министрлігіне сілтеме жасап.
Іс-шараға білім ордасының жеке құрамы, Қарулы күштердің ардагерлері, әскерге қабылданғандардың туған-туыстары қатысты.
Құттықтау сөзінде Радиоэлектроника және байланыс әскери-инженерлік институты бастығының орынбасары полковник Ойрат Атыкенов бұл оқиғаның жас сарбаздар үшін маңыздылығын атап өтті.
– Бүгін сендер әскери борыштарыңды лайықты орындауға және
Отан қорғауға ант бердіңдер. Сендерге жауынгерлік дайындықта сәттілік тілеймін. Әскери қызмет сендердің өмірлік және кәсіби жоспарларыңды жүзеге асыруда сенімді бастама боларына сенімдімін, – деді ол.
Қатардағы жауынгер Санжар Иген әскери қызмет туралы былай дейді.
– Мен әскерге өз еркіммен келдім, өйткені бұл өзімді шыңдап көруге берілген жақсы мүмкіндік. Бұл ай өте қарқынды өтті, көп нәрсені үйрендік, жаңа ортаға бейімделдік және жүктелген тапсырмаларды орындауға дайынбыз. Меніңше, бір жыл тез ақ өтеді", – деді ол.
Салтанатты рәсімнің соңында сарбаздар әскери бөлім қонақтарына қоян-қолтық ұрыс элементтерін көрсетті. Содан кейін әскери оркестрдің үнімен саптық алаңда алдағы қызметке сақадай сай екендерін көрсете салтанатты маршпен жүріп өтті.