Мамыр мерекелері қарсаңында Алматы қаласының көші-қон қызметі “Азаматтарға арналған үкімет” мемлекеттік мекемесі және Жетісу ауданы әкімдігімен бірлесіп, 16 жастағы қала тұрғындарына алғашқы жеке куәліктерді салтанатты түрде табыстау рәсімін ұйымдастырды, деп хабарлайды aqshamnews.kz Polisia.kz-ке сілтеме жасап.
Шара халыққа қызмет көрсету орталығында жылы, мерекелік жағдайда өтті. Жас алматылықтарды мемлекеттік органдардың өкілдері құттықтап, азаматтарды уақытылы құжаттандырудың маңыздылығын атап өтті.
— 16 жаста жеке куәлік алу - азаматтық жауапкершілік жолындағы маңызды қадам. Құжат білім алуға, медициналық және әлеуметтік қызметтерге қол жеткізуге, жұмысқа орналасуға және қоғам өміріне қатысуға мүмкіндік береді. Ата-аналар мен заңды өкілдерді құжаттарын рәсімдеуді кешіктірмеуге шақырамыз. Жасөспірімдердің уақытында құжаттанбауы бірқатар қиындықтар мен шектеулерге әкелуі мүмкін, - деді Алматы қалалық ПД көші-қон қызметі басқармасы бөлімінің бастығы Жанна Жақыпбаева.
Шараны ұйымдастырушылар мұндай шаралар жастардың құқықтық сауаттылығын арттырып, өскелең ұрпақтың бойында патриоттық рухты нығайтуға септігін тигізетініне сенім білдірді.