Қазақстан Республикасы Президентінің жанындағы Мемлекеттік басқару академиясы жаңа оқу жылына құжат қабылдай бастады. Өңірлік коммуникациялар қызметінде өткен брифингте Академияның Алматы қаласындағы бөлімшесінің директоры Айнұр Ыдырысова осылай деді, – деп хабарлайды aqshamnews.kz тілшісі.
Оның айтуынша, қабылдау науқаны 1 сәуірде басталып, биылғы 1 маусымға дейін жалғаспақ. Магистратура мен докторантура бағдарламасына құжатты admission.apa.kz ақпараттық жүйесі арқылы онлайн форматта тапсыра аласыз.
Спикердің айтуынша, биыл білім беру мүмкіндігінің саны артқан. 15 білім беру бағдарламасы бойынша қабылдайды, бұрын олардың саны 12 болған екен. Осы жолы оқу орны «Іскерлік әкімшілендіру (EMBA)» мен «Цифрлық мемлекеттік басқару (DDPA)» атты жаңа бағыттарды енгізіпті.
«Мемлекеттік білім беру тапсырысы бойынша магистратураға шамамен 200 адамды, докторантураға 12 адамды алу жоспарланып отыр. Сондай-ақ талапкердің функционалдық еңбек өтілін бағалау үшін арнаулы комиссия құруды да ойластырып қойдық», — деп толықтырды Айнұр Ыдырысова.
Оқудың мерзіміне де өзгеріс енгізілген. Мәселен, «Мемлекеттік саясат», «Халықаралық қатынастар» мен «Экономика» бағдарламасы ғылыми-педагогикалық бағытқа ауыстырылып, оқу екі жылға ұзартылды. «Адами ресурстарды басқару» бағдарламасы «Адами ресурстарды стратегиялық басқару» болып қайта аталып, оқу мерзімі 1,5 жылға дейін ұлғайтылған.
Талапкерге қойылатын бір талап - «Мемлекеттік саясат» бағдарламасына түсетіндердің ағылшын тілін білетінін растайтын сертификаты болуы керек.
Іріктеу бірнеше кезеңнен тұрады, оның ішінде үміткердің кәсіби және жеке құзыретін, мемлекеттік басқару жүйесі мен заңнаманы білу деңгейін бағалауға бағытталған сараптамалық эссе жазу мен әңгімелесу де бар.
Алдын ала қабылдау нәтижелері 25 маусымда, қорытынды қабылдау 10 шілдеде жарияланады. Оқу жылы 2026 жылғы 1 қыркүйекте басталады.