Бұл туралы Алматының сейсмикалық қауіпсіздік және жұмылдыру дайындығы басқармасы басшысының міндетін атқарушы Батырхан Сүлейменов айтты, деп хабарлайды aqshamnews.kz.
Басқарма базасында сейсмологтар мен сарапшылар енген ғылым және технологиялар бойынша кеңес құрылған. Ведомство бұл кеңестің талқылауына «халықты автоматты түрде ескерту жүйесін 5,5 магнитудасынан кейін қосу қаншалықты дұрыс» деген сұрақты шығарған.
— Бастапқыда 5,5 магнитудасы бойынша ескерту жасау керек деп айтылған. Бірақ магнитуда эпицентрде өлшенеді, ал эпицентр Қытайда, Қырғызстанда не Алматы облысында болуы мүмкін. Сондықтан бұл сұрақты талқыға шығардық. Ұзақ пікірталастан кейін Сейсмологиялық байқау және зерттеулер ұлттық ғылыми орталығымен бірге арақашықтықты анықтауымыз керек деген қорытындыға келді, — деді Батырхан Сүлейменов.
Айтуынша, жер сілкінісінің эпицентрі қаладан 100 шақырым жерде болса, онда ескерту жүйесі үшін ең төменгі магнитуда — 1 болғаны, егер жер дүмпуі 200 шақырымнан алыста болса, шегі одан жоғары болғаны жөн.
— Өйткені арақашықтық алыс болған сайын сейсмикалық қауіп төмен болады. Жақын арада сейсмология институты ғылыми негізде өз қорытындысын ұсынады. Соған дейін автоматтандырылған ерте ескерту жүйесі мен MasАlert жедел ескерту жүйесі түзеледі, — деді ол.