21 маусымда Алмалы ауданы, Клочков көшесі, 26-да сағат 10.00-ден 13.00-ге дейін терроризмге қарсы жоспарлы оқу-жаттығулар өтеді.
Оқу-жаттығудың мақсаты-адамдар көп жиналатын жерлерде террористік сипаттағы қауіп-қатерлер туындаған кезде өзара іс-қимыл жасау дағдыларын пысықтау. Оқу міндеттері террористік тұрғыдан осал объектілерде терроризм актісінің жолын кесу тетігін жетілдіруге бағытталған",-деп хабарлады Алматы полиция департаментінің (ПД) баспасөз қызметі.
Сонымен қатар, қауіпсіздік қызметкерлері оқу-жаттығу өткізу кезеңінде шектеу шаралары қарастырылатынын ескертті.
"Осыған байланысты, азаматтарды өткізілетін іс-шараларға түсіністікпен қарауға, қауіпсіздік шараларын сақтауға және оқу-жаттығу өткізуге тартылған мемлекеттік органдар қызметшілерінің заңды талаптарын орындауға шақырамыз. Сонымен қатар, ӘҚБтК - нің 443-бабына сәйкес, қоғамдық тәртіпті қамтамасыз етуге қатысатын адамның заңды талабына бағынбау әкімшілік жауапкершілікке әкеп соғатынын атап өткен жөн", - деп ескертті ПД-да.