Алматыда Оқу-ағарту министрлігінің Республикалық ғылыми-педагогикалық кітапханасы мен «Кітап оқитын ұлт – Читающая нация» қоғамдық қоры арасында ынтымақтастық туралы меморандумға қол қою рәсімі өтті.
Меморандумға Республикалық ғылыми-педагогикалық кітапхананың директоры Әлия Сайдембаева және «Кітап оқитын ұлт – Читающая нация» қорының тең төрағасы Шыңғыс Жұмағали қол қойды. Әлия Сайдембаева бұл құжат «Кітап оқитын ұлт» жобасы аясындағы тараптардың әріптестігін ресми түрде бекітіп, елімізде тұрақты оқу мәдениетін қалыптастыруға, сыни ойлауды дамытуға және қазақстандықтардың зияткерлік әлеуетін арттыруға бағытталған бірлескен жұмысты ұйымдастыруға жош ашады.
Ал Шыңғыс Жұмағали «Кітап оқитын ұлт» жобасы Мемлекет басшысы Қасым-Жомарт Тоқаевтың Ұлттық құрылтайда айтқан бастамасы аясында жүзеге асырылып жатқанын атап өтті.
- Жобаның басты мақсаты — қоғамда тұрақты кітап оқу мәдениетін қалыптастыру және Қазақстанды әлемдегі ең көп оқитын он елдің қатарына қосу, - деді ол.
2025 жылдың қыркүйегінде жоба пилоттық режимде Қарағанды облысында, Қостанай облысында және Шымкент қаласында басталды. Енді оған Алматы қаласы да қосылады. Қазіргі уақытта жобаға 189 мыңнан астам адам қатысып жатыр.
Жоба халықтың әртүрлі топтарын қамтиды және мына бағыттар бойынша жүргізіледі:
− «Кітап оқитын мектеп» (6–10 сынып оқушылары);
− «Кітап оқитын колледж» және «Кітап оқитын университет» (студенттер);
− «Кітап оқитын педагог» (ұстаздар);
− «Кітап оқитын әулет» (отбасылар);
− «Кітап оқитын мемлекеттік қызметші» (мемлекеттік қызметшілер).
- Әр бағыт үшін сарапшылар қатысушылардың жасы мен қызығушылығына сәйкес қазақ және орыс тілдерінде 15 кітаптан тұратын тізім құрастырды. Тізімге жалпыұлттық дауыс беру нәтижесінде таңдалған «Қазақстан әдебиетінің 100 танымал кітабы» жобасының шығармалары мен әлемдік бестселлерлер енгізілген, - деді Шыңғыс Жұмағали.
