Алматы қаласында Ішкі істер министрлігінің Киберқылмысқа қарсы іс-қимыл департаменті терроризм актісі туралы көрінеу жалған ақпарат таратуға жол берілмейтінін ескертіп, ата-аналарға үндеу жасады.
Ведомство мәліметінше, мұндай әрекеттер Қазақстан Республикасының Қылмыстық кодексінің 273-бабына сәйкес қылмыстық жауапкершілікке әкеледі. Терроризм туралы жалған хабарламалар қоғамдық қауіпсіздікке нақты қауіп төндіріп, адамдарды жаппай эвакуациялауға, мемлекеттік органдардың, білім беру және медицина мекемелерінің жұмысының бұзылуына себеп болады. Сонымен қатар төтенше қызметтердің күштері мен құралдары негізсіз жұмылдырылады.
Департамент өкілдері әрбір осындай хабарлама міндетті түрде тексерілетінін атап өтті. Жалған ақпарат таратқан тұлғалар заманауи цифрлық технологиялардың көмегімен анықталып, заң аясында жауапкершілікке тартылады. Заңнамада мұндай қылмыс үшін бас бостандығынан айыру жазасы да қарастырылған.
Осыған байланысты полиция алматылықтарға:
тексерілмеген ақпаратты таратпауға;
әлеуметтік желілер мен мессенджерлерде жалған хабарламалар жасамауға;
балаларға мұндай әрекеттердің салдары мен ата-аналардың жауапкершілігін түсіндіруге;
күмәнді немесе қауіп төндіретін ақпарат алған жағдайда дереу құқық қорғау органдарына хабарлауға кеңес береді.
Құқық қорғау органдары қала тұрғындарын заң талаптарын сақтауға және цифрлық кеңістікте жауапкершілікпен әрекет етуге шақырды.