Алматыдағы жаңа жолайрық Жансүгіров көшесі мен Сейфуллин даңғылының өткізу қабілетін 15-20%-ға арттырады.
Алматы әкімі Ерболат Досаев Жетісу ауданына жасаған жұмыс сапары барысында Жансүгіров көшесі мен Сейфуллин даңғылы қиылысындағы жолайрықтың құрылыс барысымен танысты, деп хабарлайды aqshamnews.kz
Жобаны жүзеге асыру 2017 жылы басталғанымен, 259 жер телімін сатып алу қажеттілігіне байланысты құрылыс ұзаққа созылды. Соңғы жер телімі биыл мамыр айында босатылды.
Жоба аясында Сейфуллин даңғылында көліктердің үздіксіз қозғалысын қамтамасыз ету үшін жалпы ұзындығы 690 метр болатын екі тоннель салу жоспарланған. Ал Жансүгіров көшесі бойынша көлік қозғалысы жер деңгейінде жүзеге асады. Сонымен қатар, 4 жерүсті жаяу жүргіншілер өткелі, тротуарлар және іргелес аумақты көгалдандыру қарастырылған.
Қазіргі уақытта барлық бұрылыс жолдарда асфальтбетон жабыны төселіп, бір жерүсті жаяу жүргіншілер өткелі салынды, сондай-ақ кәріз және байланыс желілерін қайта құру жұмыстары жүргізілуде.
Сонымен қатар, Сейфуллин даңғылындағы «Батыс» және «Шығыс» тоннельдеріне асфальтбетон жабын төсеу аяқталды. Демалыс күндері осы тоннельдер арқылы қозғалыс ашылып, ауа райы қолайлы болса, уақытша жол таңбаларын сызу жоспарланған.
Қала әкімі құрылыс жұмыстарын жеделдетіп, абаттандыру жұмыстарымен бірге нысанды келесі жылдың маусым айының соңына дейін аяқтауды тапсырды.
Айта кетейік, жолайрық іске қосылғаннан кейін Жансүгіров көшесінің өткізу қабілеті 15%-ға, ал Сейфуллин даңғылының өткізу қабілеті 20%-ға артатыны күтілуде.
