ҚР Төтенше жағдайлар министрлігі «Сейсмологиялық зерттеу институты» ЖШС-нің сейсмикалық станциялар желісі 2025 жылы 4 желтоқсанда, Астана уақытымен 12:45-те жер сілкінісін тіркеді.
Зілзала ошағы Алматыдан оңтүстік-шығысқа қарай 277 км қашықта, Қытай аумағында орналасқан. Магнитудасы - MPV 6.7, тереңдігі - 5 км.
Алматыда дүмпулер MSK-64 шкаласы бойынша 3 балл деңгейінде сезілді.
Қалада дабыл іске қосылды. Сауда орталықтары мен мектептер, колледждер, ЖОО мен қоғамдық орындарда эвакуация қалыпты жағдайда өтті.
Алматы ТЖД мәліметінше,полиция департаментінің патрульдік көліктері мен өрт сөндіру бөлімдерінің арнайы техникалары қала аумағын аралап тексеру жұмыстарын жүргізіп жатыр. Гидробекет бақылаушылары және инженерлік-техникалық мамандар алгоритмге сәйкес өзен арналарын және нысандарын тексеруді жалғастырады.
ТЖМ-нің "Қазселденқорғау" мемлекеттік мекемесінің мамандары өзен арналарының, гидротехникалық құрылымдардың, сондай-ақ көшкін және сел қаупі бар аймақтарды бақылауға алған.
Сонымен қатар, тұрғындарды қамтамасыз ететін инфрақұрылым нысандарының зақымданғаны-зақымданбағанын анықтау үшін визуал тексеріс қолға алынды. Қазір бұл нысандар қалыпты жұмыс істеп тұр.
Зардап шеккендер немесе қираған нысандар туралы ақпарат түскен жоқ.