Алматыда мемлекет және қоғам қайраткері, Мемлекеттік сыйлықтың лауреаты, жазушы, театр сыншысы, профессор Әшірбек Сығайдың құрметіне орнатылған мемориалды тақта салтанатты түрде ашылды, деп хабарлайды Аlmaty-akshamy.kz.
«Бұл тарихи маңызды шешім деп есептеймін. Бүгін аса көрнекті театр ұйымдастырушысына және сыншысына, қазақ өнерінің шынайы жанкүйеріне ескерткіш тақта орнатылды. Әшірбек ағаның шығармашылық өмірі біздің сүйікті қаламызбен тығыз байланысты. Оның есімі, мұрасы халқымыздың жадында, шәкірттерінің есінде мәңгі қалады», – деп атап өтті Алматы әкімінің орынбасары Арман Қырықбаев.
Театр сыншысын еске алуға танымал өнер қайраткерлері, оның ішінде Асанәлі Әшімов, Дулат Исабеков, Ұлықбек Есдәулет, Медетбек Темірхан, Нұрлан Оразалин, Есмұхан Обаев, Елубай Смағұл, Қали Сәрсенбай, Хафиз Есімов, Бақыт Бөкебай, Еркін Жуасбек, Талғат Есеналиев, т.б жазушылар мен әртістер келді.
Мемориалдық тақта белгілі театр сыншысы 1980-1999 жылдар аралығында 20 жылға жуық тұрған Жібек Жолы даңғылы, 12А (С.Мәуленов көшесінің қиылысы) мекенжайындағы үйдің қабырғасына орнатылды.
Әшірбек Сығай - Қазақстанның сахна өнерінің дамуына елеулі үлес қосқан қазақ театртану ғылымының негізін салушылардың бірі, «Іңкәр шақ» (1978), «Сыр сандық», «Сахнаға сапар», «Жарнама алдындағы ой», «Сахна саңлақтары» (1998), «Театр тағылымы» (2003), «Ән - тағдыр», «Таңғажайып театр», тағы басқа шығармалардың авторы. Оның еңбектері өнер және театр теориясы саласындағы оқулықтарға айналды.