2025 жыл Жұмысшы мамандықтары жылының аясында Қазақстан Республикасы Оқу-ағарту министрлігінің, Қазақстан Республикасы туризм және спорт министрлігінің, Алматы қаласы Білім басқармасының қолдауымен Халықаралық қазақ-қытай тіл колледжінің ұйымдастыруымен колледж студенттері арасында «Туризм» мамандығы бойынша «Жас турист» VII Халықаралық этно-эко экскурсиялық-спорттық туристік сайысы өз жұмысын аяқтады.
Екі күн бойы Алматы, Астана, Ақтау, Байқоңыр, Түркістан, Текелі қалалары мен Қырғызстан, Өзбекстан, Тәжікстан елдерінен келген «Туризм» мамандығының колледж студенттері туристік жабдықтарды пайдаланып, кедергілерден өтті. Сайыс Бутаковка шатқалында, «Лесничество» оқу-жаттығу базасында өтті, деп хабарлайды aqshamnews.kz.
Сайыс қорытындысы бойынша Текелі кәсіптік колледжі командасы 1 орын, Халықаралық қазақ-қытай тіл колледжі командасы 2-орын, Астана политехникалық колледжі командасы 3-орын иеленді.
Сайыс қорытындысы бойынша жеңімпаздар мен қатысушылар, сондай-ақ командалар жетекшілері дипломдармен, сертификаттармен және бағалы сыйлықтармен марапатталды.
Шараның негізгі мақсаты – ішкі туризмді дамыту, қоршаған ортаға ұқыпты қарау, жастардың денсаулығын нығайту, рухани және табиғи жетілуін қамтамасыз ету.
Сайыс Қазақстанның халықаралық деңгейде танымалдылығын арттыру, кіріс туризмін дамыту, этнотуризм мен салауатты өмір салтын насихаттау, сондай-ақ туристік-өлкетану қызметін ұйымдастырудағы озық тәжірибені анықтау және тарату мақсатында өткізілді.