Зауыт автокөліктерге арналған қазақ тілі интеграцияланған мультимедиялық жүйелер шығаратын болады
Алматыда Kazakhstan Mobility Engineering компаниясы қазақ тілі интеграцияланған автокөліктерге арналған мультимедиялық жүйелер шығаратын жаңа зауыт ашты. Кәсіпорын Оңтүстік Кореяның Motrex Co Ltd серіктесінің технологиясын қолданады.
Жаңа өндіріс Мемлекет басшысының «Әділетті Қазақстан: Заң мен тәртіп, экономикалық өсім, қоғамдық оптимизм» атты Жолдауында белгіленген мақсаттарға сәйкес келеді. Өнеркәсіптік әлеуетті толық ашу үшін отандық шикізат пен компоненттерді пайдалануды қоса алғанда, жүйелі көзқарас қажет. Автоөнеркәсіптің өсуі Қазақстанның өнеркәсіптік саясатының негізгі бағыттарының біріне айналып отыр, сондықтан өндірістік үдерістерді локализациялау мен тереңдетуді бірлесіп дамыту маңызды. Зауыттың іске қосылуы — жоғары деңгейде қайта өңдеуді меңгеру және ірі өнеркәсіптік нысандардың айналасында іргелес өндірістерді дамыту қадамдарының бірі. Кәсіпорын «Астана Моторс» компаниясының құрамына кіреді.
«Мультимедиялық жүйелер – бұл жоғары дәлдікті талап ететін өндіріс, ол цифрлық технологиялар мен инженерия саласындағы бірінші дәрежелі мамандардың құзыретін қажет етеді. Біздің басты мақсатымыз – локализацияның жоғары үлесі бар өндіріс циклін құру. Біз отандық шикізат пен компоненттерді барынша қолдануға тырысамыз. Сондықтан Kazakhstan Mobility Engineering еліміз үшін ерекше мәнге ие», — деді өнеркәсіп және құрылыс министрі Қанат Шарлапаев зауыттың ашылу салтанатында.
Үкімет отандық өндірушілерді қолдау мақсатында кешенді шаралар қабылдауда. Мемлекет басшысының тапсырмасына сәйкес, автокөлік өндірісінде кластерлік өндірісті дамыту бойынша жұмыстар жүргізіліп жатыр, бұл саланың тұрақты өсуіне және сыртқы нарықтардағы өнімнің бәсекеге қабілеттілігін арттыруға ықпал етпек. Сонымен қатар, биыл ауыл шаруашылығы машиналарын жасауда импорттық баламаларды субсидиялау тоқтатылды, ал техника лизингінің пайыздық мөлшерлемесін субсидиялау кезінде отандық өнімге төмендетілген мөлшерлеме белгіленді. Теміржол техникасын өндіру секторында қолжетімді лизингтік қаржыландыру механизмі іске қосылды, нәтижесінде 2024 жылы өндіріс көлемі 1,5 есеге артты.
Kazakhstan Mobility Engineering зауыты Алматының индустриалды аймағында орналасқан. Кәсіпорын 100 мың шаршы метр аумақта автокөлік бөлшектерін шығаратын ірі технопарктің құрамына кіреді. Бұл жоба өндірісті локализациялауға және қазақстандық автоөнеркәсіпті қолдауға бағытталған. Сонымен қатар, Алматы индустриалды аймағында автокреслолар, автокөліктерге арналған резеңке және пластик бұйымдарын шығаратын зауыттар мен логистикалық хабты іске қосу жоспарланып отыр. Барлық технопарктің техникалық өндірістік қуаты жылына шамамен 100 мың жиынтықты құрайды. Кластер аумағында 90-нан астам маман жұмыс істесе, ал бүкіл өндірістік кешенде шамамен 400 қызметкер жұмыс істейді деп күтілуде.