Алматы қаласында Ішкі істер министрлігінің киберқылмысқа қарсы іс-қимыл департаменті терроризм актісі туралы көрінеу жалған хабарламалар таратуға жол берілмейтінін тағы да еске салып, ата-аналарға арнайы үндеу жасады, - деп хабарлайды aqshamnews.kz.
Ведомство мәліметінше, мұндай әрекеттер үшін Қазақстан Республикасының Қылмыстық кодексінің 273-бабына сәйкес қылмыстық жауапкершілік қарастырылған. Терроризм туралы жалған ақпарат қоғамдық қауіпсіздікке нақты қатер төндіріп, адамдарды жаппай эвакуациялауға, мемлекеттік органдардың, білім беру, медицина және өзге де әлеуметтік нысандардың қалыпты жұмысының бұзылуына әкеледі. Сонымен қатар төтенше жағдайлар қызметтерінің күштері мен құралдары негізсіз жұмылдырылады.
ІІМ Киберқылмысқа қарсы іс-қимыл департаменті мұндай қылмыс үшін заңнамада бас бостандығынан айыруға дейінгі жаза көзделгенін атап өтті. Әрбір хабарлама міндетті түрде тексеріледі, ал оны таратқан тұлғалар заманауи цифрлық және техникалық құралдардың көмегімен анықталады.
Құқық қорғау органдары алматылықтарға:
тексерілмеген ақпаратты таратпауға;
интернетте, әлеуметтік желілер мен мессенджерлерде жалған қоңыраулар мен хабарламалар жасамауға;
балаларға мұндай әрекеттер үшін ата-аналардың да жауапкершілігі бар екенін түсіндіруге;
қауіп төндіретін хабарлама алған жағдайда дереу полицияға хабарлауға кеңес береді.
Полиция қала тұрғындарын заң талаптарын сақтауға және цифрлық кеңістікте жауапкершілікпен әрекет етуге шақырды.