2-7 қыркүйек аралығында Алматыда жүлде қоры 100 000 АҚШ доллары болатын «WTT Contender Almaty» халықаралық турнирі өтеді, деп хабарлайды aqshamnews.kz
Биыл жарысқа әлемнің 21 елінен 143 спортшы қатысады. Олардың қатарында Аустралия, Вьетнам, Германия, Үндістан, Иран, Испания, Қытай, Корея, Люксембург, Малайзия, Мексика, Румыния, Сауд Арабиясы, Сербия, Сингапур, Словакия, Словения, Өзбекстан, Франция, Жапония және Қазақстан бар.
Жанкүйерлер әлемдік үстел теннисінің жұлдыздары – Еуропаның үш дүркін ТОП-16 чемпионы Дарко Йоргич (Словения), жастар арасындағы әлем чемпионатының күміс жүлдегері Сора Матсушима (Жапония), Олимпиада ойындарының күміс жүлдегері Шань Сяона (Германия) және әлем чемпионатының қола жүлдегері Хонока Хашимотоның (Жапония) ойындарын тамашалай алады.
Медальдар ерлер мен әйелдер арасында жекелей, жұптық және аралас санаттар бойынша сарапқа салынады.
Турнирдің тікелей трансляциясын «Qazsport» телеарнасынан және World Table Tennis (WTT) ресми YouTube арнасынан көруге болады.
Халықаралық турнир «ADD Ustel Tennis Ortalygy» (Нұркент ықшам ауданы, 14Б) орталығында өтеді. Кіру – ақылы, билеттер kino.kz сайтында сатылады.