Алматының Түрксіб ауданында ескі тұрғын үй қорын жаңарту жұмыстары қарқынды жүргізілуде. Қала әкімі Ерболат Досаев аудан тұрғындарымен кездесу барысында 1960 жылға дейін салынған 586 үйдің жаңартылатынын хабарлады.
«2030 жылға дейінгі тұрғын үй қорын жаңартудың жаңа бағдарламасы әзірленді. Бұл бағдарламада кешенді және орамдық құрылыс, ескі үйлердің меншік иелерінің құқықтарын қорғау және тұрғын үй қорын әлеуметтік, инженерлік және көлік инфрақұрылымын дамыту арқылы жаңарту қарастырылған», – деді Ерболат Досаев.
Шілде айында Кассин көшесінде 6 жаңа үйдің құрылысы аяқталды, ал жыл соңына дейін Сауранбаев көшесінде тағы 7 үйдің тұрғындары қоныс аударады. Сонымен қатар, «Алтай-2» шағын ауданында 6 үй сатып алынып, екі тоғыз қабатты үйдің құрылысы жүргізілуде.
Алматыны дамыту және тиімді бақылауды қамтамасыз ету үшін жаңа Қала құрылысы регламенті, Құрылыс ережелері және Тұрғын үй қорын жаңарту бағдарламасы әзірленді. Бұл құжаттар жыл соңына дейін Мәслихат сессиясында бекітіледі.