Оған қоса есірткіні жарнамалайтын 450 сайтты бұғатталды.
Алматыда есірткіні жарнамалаған бес мың граффити-жазбалар боялды, деп хабарлайды Almaty-akshamy.kz ІІМ ақпараттық порталына сілтеме жасап.
Алматы қалалық ПД басшысы халық алдындағы есеп беру кездесуінде 380 келі есірткі, оның ішінде 15 келі синтетикалық есірткі тәркіленіп, заңсыз айналымға жіберілмегенін айтты.
«Біз синтетикалық есірткілерді шығаратын үш есірткі зертханасын жойдық. Интернет-ресурстар арқылы синтетикалық мефедрон есірткі затын дайындау және сатумен айналысқан есірткі бизнесі саласындағы екі ұйымдасқан қылмыстық топтың әрекетінің жолы кесілді. Биылғы жылдың басынан бері тағы бір есірткі зертханасын анықтадық, онда 150 миллион теңгенің есірткі шикізаты тәркіленді», – деді Қанат Таймерденов.
Еріктілер мен белсенді азаматтардың арқасында есірткінің таралуы туралы ақпараты бар бес мың граффити-жазбалар боялды. Есірткі сататын 450 интернет-сайт бұғатталды. «Сонымен қатар, қаланың оқу орындарында да есірткіге қарсы тақырыптар бойынша 260 профилактикалық іс-шара жүргізілді. Осы жылы да бұл бағыттағы барлық іс-шаралар жалғасын табады және ерекше бақылауда болады», – деді Қанат Таймерденов.