58 келіден астам есірткі заттары тәркіленді, контрабанданың 57 әрекеті тоқтатылды, бір жасырын зертхана жойылды, осындай нәтижелерді Алматы қаласы Экономикалық тергеу департаментінің басшысы Данияр Ақжанов өңірлік коммуникациялар қызметінің баспасөз конференциясында хабарлады.
Оның айтуынша, Алматы әуежайы Орталық Азияның ірі авиациялық хабы бола отырып, есірткіні, негізінен АҚШ пен Еуропа елдерінен заңсыз әкелу әрекеттерінің негізгі бағыттарының бірі болып қала береді. Алайда құқық қорғау органдарымен жүйелі және үйлесімді жұмыс жүргізудің арқасында тыйым салынған заттарды жеткізу әрекеттері ұдайы тоқтатылып отырады.
«Заң және Тәртіп» іс-шаралары аясында біз есірткі құралдарын контрабандалық әкелу фактілерін анықтау және жолын кесу бойынша белсенді жұмыс жүргізудеміз. Тек өткен жылы ғана 10 адам пошталық аударым арқылы контрабанда жасағаны үшін сотталды, оларға нақты 8 жылдан 17 жылға дейін бас бостандығынан айыру мерзімдері тағайындалды», - деп атап өтті Данияр Ақжанов..
Спикердің айтуынша, жұмыс 2025 жылы да жалғасуда. Есірткіні шекара арқылы заңсыз тасымалдаудың 11 фактісі тіркелген. Алматыда, сондай-ақ Петропавл, Семей, Көкшетау, Шымкент және Өскеменде өткізілген жедел іс-шаралардың нәтижесінде АҚШ-тан почта жөнелтілімдерін халық тұтынатын тауарлар ретінде жасырылған есірткі заттарымен алған адамдар ұсталды.
«Заңсыз айналымнан 8 келіге жуық марихуана мен 15 келіге жуық гашиш майы алынды. Бұл - оперативтер, кинологтар және басқа да мамандардың бірлескен жұмысының нәтижесі», - деді Ақжанов.
Алматы ЭТД басшысы азаматтардың есірткі қылмысына қарсы күреске қатысуының маңыздылығын атап өтіп, күдікті фактілер туралы ҚР ҚМ-1458 Call - орталығының нөмірі бойынша хабарлауға шақырады.
«Есірткінің заңсыз айналымына қарсы күрес біз үшін басымдық болып қала береді. Біз Алматыда және бүкіл елде заңдылық пен қауіпсіздікті қамтамасыз ету бойынша жұмысты жалғастыратын боламыз», - деп қорытындылады ЭТД басшысы.