Еңбек көші-қоны саласындағы халықаралық ынтымақтастықты кеңейту және Қазақстанды Employment Permit System (EPS) жүйесіне қосу мақсатында 2026 жылы 21 қаңтарда Алматы қаласына Корея Республикасының Жұмыспен қамту және еңбек министрлігінің делегациясы келді. Делегацияның сапары Қазақстанда EPS орталығын ұйымдастыруға арналған инфрақұрылымның дайындық деңгейімен танысуға бағытталған.
EPS жүйесіне қосылу рәсімі үш кезеңнен тұрады:
1. Ішкі мемлекеттік келісу;
2. EPS орталығын ашуға арналған нысандармен танысу және оларды тексеру;
3. Корея Республикасының Ведомствоаралық комиссиясының түпкілікті шешім қабылдауы.
Қазіргі уақытта Қазақстан Республикасы бірінші кезеңнен сәтті өтіп, екінші кезеңге кірісті. Бұл кезең Алматы қаласында, сондай-ақ Алматы облысында өткізіліп, EPS орталығын ашуға жоспарланған нысандарды тексереді.
Соңғы шешім барлық кезеңнен өткеннен кейін қабылданады.
Айта кету керек, Еңбек және халықты әлеуметтік қорғау министрлігі мүдделі орталық мемлекеттік органдармен, сондай-ақ Алматы қаласы мен Алматы облысының әкімдіктерімен бірлесіп, Корея Республикасында заңсыз жұмыс істеп жүрген Қазақстан азаматтарының санын кезең-кезеңімен азайтуға арналған іс-қимыл жоспарын әзірледі. Жоспарды іске асыру заңды әрі қауіпсіз жұмыспен қамтуды қамтамасыз етуге, заңсыз көші-қонның алдын алуға, сондай-ақ Қазақстанды EPS жүйесіне қосу үшін қажетті жағдай жасауға бағытталған.