Алматыда Ғылым қызметкерлері күніне орай Қазақ спорт және туризм академиясында жас ғалымдар бас қосқан «Дене шынықтыру, спорт, туризм, білім және ғылымды дамытудың басым ғылыми-педагогикалық бағыттары» атты III Халықаралық Форум өтті.
Оған Ұлттық ғылым академиясының өкілдері және жас, жетекші ғалымдар мен өндірістегі мамандар қатысты, деп хабарлайды aqshamnews.kz.
Олар цифрлық технологиялар мен жасанды интеллектіні енгізу арқылы, халықты бұқаралық спортқа тарту, орта білім беру мекемелерінде дене шынықтыруды жаңартылған бағдарлама негізінде оқыту мен жоғары жетістіктер спортында спортшыларды кешенді бақылау арқылы жаттығу үрдісін жоспарлау, туристік қызметтерді цифрландыру, инклюзивті туризмді дамыту мен жаңа буын кадрларын даярлау, экологиялық, емдеу-сауықтыру мен мәдени туризмнің болашағы, сондай-ақ спорттық туризмнің дамуы сияқты өзекті мәселелерді талқылады.
Іс-шара аясында ҚР Еңбек сіңірген жаттықтырушысы және Халықаралық дәрежедегі спорт шебері Байтұрсынов Серік Самұратұлы студенттермен брейн-ринг өткізді.
Стартаптар сайысында студенттер жасанды интеллект элементтері бар интеллектуалды мейрамхана, кино-кафе, қонақтардың көңіл-күйін мәзір мен атмосфера арқылы өзгерте алатын Mood-Food жобасын таныстырды. Сондай-ақ қонақжайлылық саласын роботтандыру мен цифрлық трансформациялау сияқты жобаларды қарастырып, қазылар алқасынан әділ бағаларын алды.
Форум соңында 2025 жылғы ғылыми-зерттеу жұмыстарын жүргізу үшін ҚазСТА ректоры грантының жеңімпаздары марапатталды.