Алматы әкімдігі мемлекет мұқтажы үшін жер учаскелерін мәжбүрлеп иеліктен шығаруға қатысты бірқатар қаулыға өзгерістер мен толықтырулар енгізді, – деп хабарлайды aqshamnews.kz тілшісі.
Тиісті қаулыға 2026 жылғы 17 шілдеде қол қойылған. Құжаттың нөмірі – №3/405-1076.
Қаулыға сәйкес, 2025 және 2026 жылдары қабылданған жер учаскелерін немесе өзге де жылжымайтын мүлікті мемлекет мұқтажы үшін алып қою рәсімін бастау туралы алты қаулыға түзету енгізіледі.
Атап айтқанда, кейбір жер учаскелері тізімнен алынып тасталып, бірқатар нысанға қатысты мәліметтер жаңа редакцияда берілді. Сонымен қатар, тізім жаңа жолдармен толықтырылды.
Өзгерістер мына қаулыларға қатысты:
2025 жылғы 22 қаңтардағы №1/1-61 қаулы;
2025 жылғы 2 сәуірдегі №2/262-519 қаулы;
2025 жылғы 15 тамыздағы №3/470-1139 қаулы;
2025 жылғы 4 қыркүйектегі №3/470-1177 қаулы;
2026 жылғы 6 мамырдағы №2/195-631 қаулы;
2026 жылғы 22 мамырдағы №2/195-706 қаулы.
Ең көп өзгеріс 2026 жылғы 22 мамырда қабылданған қаулыға енгізілген. Құжаттағы бірнеше жер учаскесіне қатысты ақпарат қайта редакцияланып, тізім жаңа нысандармен толықтырылды.
Алматы қаласы әкімінің аппараты қаулыны қабылданған күннен бастап үш жұмыс күні ішінде әкімдіктің интернет-ресурсында және жергілікті бұқаралық ақпарат құралдарында жариялауға тиіс.
Алматы қаласы Жер қатынастары басқармасына қаулыдан туындайтын қажетті шараларды қабылдау тапсырылды. Құжаттың орындалуын бақылау қала әкімінің жетекшілік ететін орынбасарына жүктелді.