Алматыда БФЛ-дің жаңа маусымы басталды: балалар футболы жаңа деңгейге көтерілуде, – деп хабарлайды aqshamnews.kz тілшісі.
Алматыда «Балалар футбол лигасы» жобасының жаңа маусымы ресми түрде ашылды. Жаңа маусымда қала алаңдарына мыңдаған жас футболшы қайта шығады. Жоба бүгінде Қазақстандағы ең ірі балалар мен жасөспірімдер футбол қозғалыстарының біріне айналып отыр.
Алматы қаласы Спорт басқармасы жүзеге асырып отырған «Балалар футбол лигасы» жобасы өткен маусымда айтарлықтай дамып, біртіндеп Қазақстанның болашақ футболшыларын даярлайтын толыққанды жүйеге айналып келеді.
Бүгінде БФЛ жай ғана қалалық турнир емес. Жаңа маусымда лигада 13 жас санаты бойынша 320 команда өнер көрсетеді. Әр демалыс сайын мыңдаған бала Алматының футбол алаңдарына шығады.
Соңғы бір жыл ішінде жобада жарыстарды ұйымдастыру сапасы айтарлықтай жақсарды. Матч өткізу форматы жаңартылып, заманауи спорттық орта қалыптастыруға басымдық берілді. Қазір ойыншылар мен командаларды цифрлық тіркеу жүйесі енгізіліп, статистика жүргізіліп, сондай-ақ матчтардың онлайн көрсетілімі ұйымдастырылған.
Жобаның басты нәтижелерінің бірі — жас спортшылардың кәсіби деңгейге көтерілуіне нақты мүмкіндік берілуі. 300-ден астам қатысушы спорттық нормативтерді орындап, түрлі спорттық разрядтарға ие болды. Ал бірқатар жас футболшы бүгінде Қазақстанның кәсіби клубтары мен футбол академияларында дайындалып жатыр.
Алматы қаласы Спорт басқармасы өкілдерінің мәліметінше, жобаның негізгі мақсаты тек жарыс өткізу емес, әр бала өз қабілетін көрсетуге мүмкіндік алатын толыққанды футбол экожүйесін қалыптастыру. Сол себепті БФЛ-ге қатысу толықтай тегін болып қала береді.
Бүгінде БФЛ Қазақстандағы ең ауқымды балалар мен жасөспірімдер футбол жобаларының біріне айналып, елдің болашақ футболшыларының қалыптасу жолындағы маңызды алаңға айналып отыр.