Алматы қаласының әкімдігі хабарлағандай, белгісіз адамдар 30-дан астам жас ағаш көшеттерін зақымдаған, деп хабарлайды aqshamnews.kz
"2024 жылдың 12 тамызында осы оқиға бойынша Әуезов ауданының әкімдігі мен полиция басқармасының қызметкерлері бірлесіп, оқиға орнына барды. Тексеру барысында 36 көшеттің (катальпа - 15 дана, акация - 8 дана және шетен - 13 дана) діңінің ортасынан сынғаны анықталды. Бұл көшеттерді Әуезов аудандық әкімдігімен келісімшарт бойынша "Стамп Сервис" ЖШС компаниясы отырғызған. Компания қызметкерлері кінәлі тұлғаларды анықтау үшін Әуезов ауданының полиция басқармасына арызбен жүгінді", - деп хабарлады әкімдік.
Сондай-ақ, полиция қызметкерлері куәгерлерден жауап алып, бейнебақылау камераларының жазбаларын зерттеп жатыр.
Зақымдалған ағаштар өмір сүруге жарамсыз болғандықтан, күзде мердігер ұйымның күшімен көшеттерді ауыстыру жоспарлануда.
"Егер бұзақы анықталса, Қазақстан Республикасының Әкімшілік құқық бұзушылық туралы кодексінің 386-бабына сәйкес "Жасыл желектерді ұстау және қорғау ережелерін бұзу" бойынша жеке тұлғаларға 30, шағын кәсіпкерлік субъектілері мен коммерциялық емес ұйымдарға 60, орта кәсіпкерлік субъектілеріне 100, ірі кәсіпкерлік субъектілеріне 300 айлық есептік көрсеткіш мөлшерінде айыппұл салынады", - деп мәлімдеді Алматы қаласының әкімдігі.