Болашаққа салынған инвестиция. Қазір Алматыда арнайы мектепке дейінгі білім беру орындарының педагогтары үшін ұйымдастырылып жатқан тренигтерді осылай атауға болады. Аталған сала бойынша отандық және шетелдік мамандар ұсыныс етілген трениг сабақтары Ө.Ә.Жолдасбеков атындағы Студенттер сарайында өтіп жатыр деп хабарлайды Almaty-akshamy.kz.
15 қарашадан басталған ауқымды тренигке аталған сала бойынша ең үздік отандық және шетелдік сарапшылар ұсыныс етілген. АҚШ, Испания, Швеция, Финляндия, Германия, Норвегия, Ұлыбритания, Ресей және тағы басқа да 10-нан астам елден 30-дан астам сарапшы сабақ беруде.
Отандық және шетелдік спикерлер қатарында мектепке дейінгі білім беру саласының ең үздік сарапшылары, педагогтары мен практиктері, сондай-ақ, балабақшалардың директорлары да бар. Олар қазіргі кездегі балабақшаларда білім берудің ең жаңа әрі озық тәжрибелерімен бөліседі. Олардан Алматыдағы 192 мектепке дейінгі білім беру орындарынан 2210 педагог сабақ алуда.
«Басты мақсатымыз – қаламыздағы мектепке дейінгі білім беру мекемелеріндегі мамандардың біліктілігін арттыру», – дейді ауқымды шара туралы пікірімен бөліскен Алматы қалалық Білім басқармасының Мектепке дейінгі бөлімінің бас маманы Ұлжан Батырбаева. Ол және бұл жобадан біздің мамандар сабақтарға қатысып қана қоймай, өзара пікір алмасу арқылы жаңа иделар табады деген сенімде.
«Бұл сабақтар 156 академиялық сағатқа қарастырылған. Онда отандық және шетелдік спикерлер аталған саладағы жаңа методикалық иновациялық технологиялардың қолданылуын біздің мамандарға үйретіп, бізде ғана емес әлем елдерінде осы салада қандай жаңалықтар болып жатқанын жеткізсе дейміз. Айталық, өзге елдерде балабақшалар үшін ата-аналардан қандай талаптар қойылуда, әрі оны қалай шешіп жатыр деген сұрақтарды да қарастыруды көздедік», – дейді бас маман Ұлжан ханым.
Айта кетейік, бұл жоба Алматы қаласын дамытудың 2025 жылға дейінгі бас жоспары аясында өтуде. Әрі мектепке дейінгі білім беру саласының мамандарына арналған бұндай ауқымды жоба елімізде алғаш рет өткізілуде. Балабақшалардағы білім беру сапасын жоғарлату, ондағы мамандардың кәсіптік білімін жетілдіруде бұл жобаның тигізер пайдасы мол болары анық.
