“UAQYT” қоғамдық қоры Алматы қаласы Жастар саясаты басқармасының қолдауымен Әуезов ауданы демалыс орталықтарының «AUEZOV FEST-2025» жәрмеңкесін сәтті өткізді.
”Біздің қор Әуезов ауданындағы жасөспірімдер мен жастардың бос уақытын тиімді өткізіп, олардың шығармашылық, зияткерлік, спорттық дағдысы мен мүмкіндігін жан-жақты дамытуға қызмет ететін демалыс орындарының жұмысын үйлестіріп отырады. Ауданда 30 үйірме, секция жұмыс істейді. Оларға бүгінде 12 жастағы жасөспірімнен бастап, 35-ке дейінгі жастар қатысып жүр. Бәрі тегін. Бүгінгі жәрмеңкеге 17 демалыс орталығы келді. Бұл жәрмеңке демалыс орталықтарының жетістігін, сондай-ақ үйірмелерге қатысқысы келетін жастар үшін мүмкіндік алаңын ұсынды. Қазір жазылып кетіп, ертеңнен бастап қатыса беруіне болады”, - дейді “UAQYT” қоғамдық қорының директоры Бауыржан Сәбитұлы.
“AUEZOV FEST-2025” фестивалі қаладағы “Сарыарқа” алаңында өтті.
Онда фестиваль қатысушылары мен қонақтары үшін демалыс орталықтарының жәрмеңкесі, ойын-сауық концерттік бағдарламасы, дамытушы “шеберлік сыныбы” және спорттық жарыстар ұйымдастырылды.
”Біздің “АR” орталығынын тігін цехы бар. Ұлттық киімдер, тақия тігеміз. Әшекей бұйымдар жасаймыз. Өзіміз тіккен осы киімдермен ұлттық сән апталықтарына шығып жүрміз. Бұл - менің дизайнерлік жобаларымның бірі. Бізге тігін өнерімен айналысқысы келетін жастар көп келеді. Оларды жатсынбай, бірден бауырға тартып, тігіншіліктің қыр-сырын үйретеміз. Тіккен бұйымын көпшілікке ұсына, сата білуді де үйретеміз. Бұл істі хобби көретіндер, уақытын тиімді өткізгісі келетін жасөспірімдер де аз емес. Оларға да есігіміз ашық. Жастардың дамығаны, сүйікті ісімен айналысқаны бізді әрдайым қуантады”, - дейді “AR” демалыс орталығының жетекшісі, танымал дизайнер Раушан Әнуарбекова.