«Алғашқы әскери және технологиялық дайындық пәнінің мазмұны мен патриоттық тәрбие басымдылығы» тақырыбында республикалық семинар-практикум өтті, – деп хабарлайды aqshamnews.kz тілшісі.
2026 жылдың 25 ақпан күні Алматы қаласы Білім басқармасының «Қалалық дене шынықтыру және спорт оқу-тәжірибелік орталығы» ұйымдастыруымен, Қазақстан Республикасы Үкіметінің «Жастарға әскери-патриоттық тәрбие берудің 2030 жылға дейінгі тұжырымдамасын бекіту туралы» қаулысына сәйкес республикалық семинар-практикум өткізілді. Іс-шараның басты мақсаты – әскери-патриоттық тәрбиені жүйелі дамыту, педагогтердің кәсіби құзыреттілігін арттыру және озық тәжірибелерді республика көлемінде тарату.
Семинар-практикум Республикалық «Жас Сарбаз» әскери-патриоттық қозғалысының төрағасы Мейірбек Оразұлының қатысуымен №222 жалпы білім беретін мектеп базасында өтті. Іс-шара алғашқы әскери және технологиялық дайындық пәні мұғалімдеріне арналды. Республикалық деңгейдегі маңызды алаңға еліміздің әр өңірінен тәжірибелі мамандар шақырылды. Спикерлер қатарында:
– «Айбын–2025» әскери-патриоттық жастар жиынының жеңімпазы, Абай облысы, Семей қаласындағы Шәкәрім атындағы №5 көпбейінді гимназиясының алғашқы әскери және технологиялық дайындық пәні мұғалімі, педагог-зерттеуші, Абай облысының «Жас Сарбаз» әскери-патриоттық қозғалысының төрағасы Түсіпов Серік Асаубаевич «Айбын – жігерлі жастардың шыңдалу алаңы» тақырыбында өз тәжірибесін бөлісті.
– Атырау облысы білім басқармасының «Сармат» мамандандырылған мектеп-лицей-интернатының директоры, Атырау облысы «Жас Сарбаз» әскери-патриоттық қозғалысының төрағасы Елеуов Нұрлан Мұханбетжанович «Мамандандырылған әскери мектеп – ел қорғанын тәрбиелеу негізі» тақырыбында баяндама жасады.
– Қостанай облысы, Ұзынкөл ауданы, Ұзынкөл №1 орта мектебінің алғашқы әскери және технологиялық дайындық пәні мұғалімі, педагог-зерттеуші, Қостанай облысы «Жас Сарбаз» әскери-патриоттық қозғалысының төрағасы, нысана көздеп атудан республикалық «Мерген ару–2025» байқауының жеңімпазы Лезбаев Сергей Калиевич «Әскери-патриоттық клубтардағы оқушылардың ату дағдыларын дамыту әдістемесі» тақырыбында іс-тәжірибесімен бөлісті.
– Алматы облысы, Іле ауданы, Ы.Ноғайбаев атындағы №18 орта мектебінің алғашқы әскери және технологиялық дайындық пәні мұғалімі Абдрешов Досым Қанапиянович «Алғашқы әскери және технологиялық дайындық пәні мен әскери-патриоттық тәрбие бойынша нормативтік-құқықтық негіздер» тақырыбында баяндама жасап, тәжірибе алмасты.
– Алматы облысы, Еңбекшіқазақ ауданы, М.Ломоносов атындағы орта мектептің алғашқы әскери және технологиялық дайындық пәні мұғалімі, педагог-зерттеуші Мунтинов Берік Ерболанович «Жас Сарбаз» тәрбиеленушілеріне патриоттық тәрбие беру бағытындағы іс-тәжірибесімен бөлісті.
Семинар барысында әскери-патриоттық тәрбие берудің заманауи әдіс-тәсілдері, халықаралық және республикалық жастар жиындарының тәрбиелік маңызы, жас ұрпақтың бойында отансүйгіштік рухты қалыптастыру жолдары кеңінен талқыланды. Қатысушылар практикалық шеберлік сағаттарына қатысып, әскери-қолданбалы спорт элементтері мен ұйымдастыру тәжірибесі бойынша нақты ұсыныстар алды.
Аталған республикалық семинар-практикум әскери-патриоттық тәрбиені жаңа деңгейге көтеруге бағытталған маңызды қадам болды. Іс-шара педагогтердің кәсіби өзара байланысын нығайтып, өңіраралық тәжірибе алмасуды күшейтті. Жастардың бойында елге деген сүйіспеншілік, азаматтық жауапкершілік пен отансүйгіштік қасиеттерді қалыптастыру – мемлекеттік саясаттың басым бағыттарының бірі. Осы тұрғыда Алматыда өткен республикалық семинар-практикум әскери-патриоттық тәрбиені дамыту жолындағы мазмұнды әрі нәтижелі алаң ретінде жоғары бағаланды.
