1 наурыз күні Алматыдағы Aport Mall East сауда-ойын-сауық орталығында Алғыс айту күніне арналған ауқымды «ALGYS FEST» мерекелік концерті ұйымдастырылды, – деп хабарлайды aqshamnews.kz тілшісі.
Көктемнің алғашқы күнімен тұспа-тұс келген айтулы іс-шара қала тұрғындары мен қонақтарына ерекше мерекелік көңіл күй сыйлап, ризашылық пен мейірімге толы тағылымды атмосфера қалыптастырды.
Биыл Алғыс айту күні елімізде ресми түрде 10 рет тойланып отыр. Осы уақыт ішінде бұл мереке қоғамдағы өзара құрмет пен сенімді нығайтып, қазақстандықтардың бірлік, татулық және өзара қолдау құндылықтарын дәріптейтін маңызды күнге айналды. Аталған мерекелік іс-шара да осы игі дәстүрдің жалғасы ретінде ұйымдастырылды.
Іс-шараның басты мақсаты – қоғамда алғыс айту мәдениетін кеңінен насихаттау, азаматтарды игі істерге және бір-біріне ризашылық білдіруге үндей отырып, қоғамдық келісім мен жалпыұлттық бірлікті нығайту. Мыңдаған көрермен жиналған мерекелік кеш басталған сәттен-ақ сауда орталығының алаңы шаттық пен қуанышқа бөленді.
Концерттік бағдарламада еліміздің танымал өнер өкілдері – Алашұлы, Raim, Ерке Есмахан, Kalifarniya, «Алатау серілері», «Арқайым», Нұрсұлтан Нұрбердиев, Балауса Ерғалина, Серікбол Сайлаубек, сондай-ақ «Алатау» дәстүрлі өнер театрының артистері өнер көрсетіп, көрермендерге көтеріңкі көңіл күй сыйлады. Өнерпаздар жиналған қауымды көктемнің алғашқы мерекесі – Алғыс айту күнімен құттықтап, жүрекжарды лебіз жолдады.
Іс-шара барысында қоғам белсендісі, неміс этносының өкілі Алина Кан құттықтау сөз сөйлеп, қазақ халқына деген ерекше алғыс білдірді. Ол Қазақстан халқының кеңпейілділігі мен мейірімділігіне ризашылығын жеткізіп, елдің амандығы мен тыныштығын тіледі. Бұл тағылымды сөз мерекенің мәнін айшықтап, өзара сыйластық пен ынтымақтың маңызын тағы бір мәрте көрсетті.
Ұйымдастырушылар Алғыс айту күнінің тарихи әрі қоғамдық маңызына тоқталып, мерекенің елдегі қоғамдық келісім мен жалпыұлттық бірлікті нығайтудағы айрықша рөлін жеткізді. Он жылдық белесті еңсерген мереке бүгінде қазақстандық қоғамдағы рухани құндылықтарды жаңғыртып, әр азаматтың жүрегінде ризашылық пен ізгілік сезімін қалыптастыруға ықпал етіп келеді.
«ALGYS FEST» мерекелік концерті жоғары деңгейде ұйымдастырылып, көпшілікке ерекше әсер сыйлады. Кеш барысында көрермендер бір-біріне ақжарма тілек ақтарып, ортақ қуанышқа бөленді. Ауқымды мәдени іс-шара Алғыс айту күнінің мазмұнын тереңдете түсіп, ел бірлігі мен татулығын дәріптеген тағылымды мерекеге айналды.
